Belgili saiasattanýshy Ǵaziz Ábishev Qazaqstannyń apatqa ushyraǵan ushaqtyń qara jáshigin Braziliiaǵa berýge qatysty oiyn aitty, - dep habarlaidy Dalanews.kz.
Ábishev Qazaqstanǵa saiasi qysym kórsetilip jatýy múmkin ekenin atap ótti.
"Vitse-premer Bozymbaev Ázerbaijan ushaǵynyń apatyn tergep jatqan Qazaqstan komissiiasyna eshqandai qysym jasalmaǵanyn aitty. Alaida jaǵdaidyń kúrdeli ekeni aiqyn. Bul Ázerbaijan basshylyǵynyń ritorikasynan baiqalady. Eger Baký men Máskeý arasynda tolyq ózara túsinistik bolsa, mundai málimdemeler jasalmas edi.
Múmkin, Qazaqstanǵa da belgili bir saiasi qysym kórsetilip jatqan shyǵar, ony qandai da bir jeńildikterge kóndirý maqsatynda. Atap aitqanda, Resei qara jáshikterdi TMD-nyń Halyqaralyq aviatsiia komitetine (HAK) tapsyrý ideiasyn belsendi túrde alǵa tartty. Osyndai jaǵdaida Qazaqstan basshylyǵynyń apatqa ushyraǵan ushaqtyń qara jáshikterin Braziliianyń Aviatsiialyq oqiǵalardy zertteý jáne aldyn alý ortalyǵyna (CENIPA) berý týraly sheshimi printsiptik qadam boldy", - deidi saiasattanýshy.
Ǵaziz Ábishev bul sheshim qysymdy beitaraptandyrýǵa jáne halyqaralyq qaýymdastyq senetin obektivti shifrlaý protsesin qamtamasyz etýge baǵyttalǵanyn aitady.
"Prezident Toqaev, Áliev jáne Pýtinmen sóilesip, Resei men Ázerbaijan arasyndaǵy kúrdeli daýda beitarap deldal retinde áreket etip, obektivti tergeý úshin jaýapkershilik alǵannan keiin, dál osy sheshim eń ońtaily ári barlyq taraptar men halyqaralyq qaýymdastyq úshin qolaily bolady degen qorytyndyǵa kelgen siiaqty", - deidi Ábishev.
Eske salaiyq, Qazaqstannyń Kólik ministrligi Aqtaýdaǵy ushaq apatyn tergeýge qatysty málimdeme jasaǵan bolatyn.
Chikago konventsiiasynyń 13-qosymshasyna sáikes, apat oryn alǵan el ushaqtyń qara jáshigin zerttep, derekterin oqýdy qamtamasyz etýge mindetti. Sonymen birge bul derekterdi qai elde taldaitynyn da ózi sheshedi.
Qazaqstan bul konventsiiaǵa 1992 jyly qosylyp, Halyqaralyq azamattyq aviatsiia uiymynyń (IKAO) tolyqqandy múshesi atanǵan. Osy talaptarǵa súiene otyryp, sondai-aq Ázerbaijan men Reseidiń aviatsiialyq organdarymen aqyldasqan soń, QR Kólik ministri Marat Qarabaev basqaratyn komissiia Embraer ushaǵynyń qara jáshigin Braziliiadaǵy CENIPA ortalyǵyna jiberý týraly sheshim qabyldady.
CENIPA – aviatsiialyq oqiǵalardy zertteýge arnalǵan halyqaralyq deńgeidegi mamandandyrylǵan ortalyq. Onda derekterdi oqýǵa qajetti qural-jabdyqtar men sertifikattalǵan zerthana bar.
Ministrliktiń aitýynsha, bul másele Memleket basshysynyń tikelei baqylaýynda.
Aita keteiik, buǵan deiin Kólik vitse-ministri Talǵat Lastaev apatqa ushyraǵan ushaqtan tabylǵan qara jáshiktiń qashan ashylatyny jaily málimdeme jasaǵan edi.
Lastaevtyń aitýynsha, ony ashýdyń naqty qadamy bar.
