Qazaqstannyń Syrtqy ister ministrligi sýdia Aigúl Sailybaevaǵa qatysty is boiynsha Resei tarapyna resmi saýal joldady, dep habarlaidy Dalanews.kz.
Vedomstvo málimetinshe, Reseidiń quzyrly organdarynan kúdiktiler - Natalia men Aleksandr Dontsovtar ustalǵany jóninde ázirge resmi aqparat túspegen.
SIM baspasóz qyzmeti buqaralyq aqparat quraldarynda jariialanǵan málimetke bailanysty reseilik tarapqa tiisti suraý salynǵanyn habarlady. Sonymen qatar, ministrlik ókilderi ekstraditsiia máseleleri syrtqy ister organdarynyń emes, quqyq qorǵaý qurylymdarynyń quzyretine kiretinin málimdedi.
Aita keteiik, buǵan deiin marqum eks-sýdia Aigúl Sailybaevanyń kúieýi men enesi Máskeýde ustalǵany týraly aqparat tarady. Bul týraly marqumnyń aǵasy Qanat Sailybaev jelidegi paraqshasynda málimdedi. Onyń aitýynsha, kúdiktiler Máskeýden tabylyp, politsiia bólimshesine jetkizilgen.
Eske salaiyq, 2024 jylǵy 7 maýsymda Qanat Sailybaev Germaniiada júrgen qaryndasy Aigúl Sailybaeva joǵalyp ketkenin málimdedi. Aigúl Sailybaeva Astananyń Saryarqa aýdandyq sotynyń burynǵy sýdiasy, sondai-aq, "Bolashaq" baǵdarlamasynyń túlegi bolǵan.
Keiin Qazaqstannyń Syrtqy ister ministrligi qazaqstandyq diplomattar jergilikti politsiiaǵa jedel túrde júgingenin, izdestirý sharalary bastalǵanyn habarlady. Al 16 maýsymda joǵalyp ketken qazaqstandyqtyń máiiti tabyldy.
Qazaqstannyń Ishki ister ministrligi sýdia Aigúl Sailybaevanyń kúieýi men enesine izdeý jariialaǵan bolatyn.
