Qazaqstan úsh memleketpen birlesken temirjol kásipornyn qurýdy josparlap otyr, dep habarlaidy Dalanews.kz.
Bul týraly Kólik ministri Marat Qarabaev Úkimet otyrysynda málimdedi.
Ministrdiń aitýynsha, Qazaqstannyń temirjol salasyn damytý sharalary eldiń tranzittik dálizderin nyǵaitýǵa baǵyttalǵan. Qazirgi ýaqytta "Soltústik-Ońtústik" jáne "Transkaspii" tranzittik dálizderiniń ótkizý múmkindigin arttyrý jumystary qarqyndy júrgizilýde.
"Álemdegi dástúrli logistikalyq baǵyttardyń ózgerýi Soltústik-Ońtústik dáliziniń mańyzdylyǵyn arttyryp otyr. Búginde bul baǵyttyń júk tasymaldaý áleýeti jylyna 10 mln tonnaǵa jetken," – dedi Qarabaev.
Onyń málimdeýinshe, dálizdiń ótkizý múmkindigin 20 mln tonnaǵa deiin ulǵaitý josparlanýda. Osy maqsatta 2024 jyldyń shildesinde Iran, Túrikmenstan jáne Reseimen birge dálizdi sinhrondy túrde damytýǵa arnalǵan Jol kartasyna qol qoiylǵan.
"Bul baǵyttaǵy tranzittik tasymaldarǵa 50% kóleminde arnaiy tariftik jeńildikter engizildi. Sonymen qatar, Soltústik-Ońtústik dáliziniń shyǵys baǵytynda biryńǵai kólik-logistikalyq operator qurý jumystary qolǵa alynýda.
Qazaqstan men Resei birlesken kásiporyn qurý boiynsha daiyndyq jumystaryn aiaqtady. Endi Túrikmenstan tarapynan jobaǵa qatysý týraly sheshim kútilýde," – dep naqtylady vedomstvo basshysy.
Osy jobanyń júzege asýy óńirdegi tranzittik áleýetti edáýir arttyryp, halyqaralyq júk tasymalyndaǵy Qazaqstannyń rólin kúsheitedi dep boljanýda.
