Qazaqstanǵa saparmen kelgen Resei Syrtqy ister ministrliginiń basshysySergei Lavrov Almatyda orden aldy, dep habarlaidy Dalanews.kz.
11 sáýir kúni Sergei Lavrov Almatyda TMD Syrtqy ister ministrleri keńesiniń biylǵy alǵashqy otyrysyna qatysady.
Al 10 sáýir kúni Reseidiń syrtqy ister ministri Sergei Lavrov Almatyda Qazaqstan Premer-ministriniń orynbasary – Syrtqy ister ministri Murat Nurtileýmen kelissózder júrgizdi.
Taraptar ekijaqty strategiialyq áriptestik pen odaqtastyq rýhynda ótken kezdesýde mańyzdy halyqaralyq jáne óńirlik máselelerdi, sonymen qatar eki el arasyndaǵy kún tártibindegi negizgi taqyryptardy talqylady. Sonymen qatar, Eýraziialyq keńistiktegi integratsiialyq alańdar men memleketaralyq birlestikter aiasyndaǵy yntymaqtastyqtyń negizgi ustanymdary kelisildi.
Uly Otan soǵysyndaǵy Jeńistiń 80 jyldyǵyna orai Sergei Lavrov pen Murat Nurtileý Panfilovshylar saiabaǵyndaǵy Máńgilik alaýǵa gúl shoqtaryn qoidy. Sonymen qatar, delegatsiia Qazaqstan Qarýly kúshteriniń Memlekettik áskeri-tarihi mýzeiine bardy.
Sapar barysynda Lavrov Voznesen kafedraldy soboryna da bardy. Onda ol Astana jáne Qazaqstan mitropoliti Aleksandrmen kezdesti. Kezdesý aiasynda mitropolit Resei SIM basshysyna Qazaqstan Pravoslav shirkeýiniń eń joǵary marapaty – «Beibitshilik pen kelisim» ordenin tabystady.
Resei Syrtqy ister ministrliginiń málimdeýinshe, bul sapar – Máskeý men Astana arasyndaǵy senimdi seriktestiktiń kórinisi. Ol eki el arasynda 2025 jyly ótetin joǵary jáne asa joǵary deńgeidegi mańyzdy is-sharalarǵa mazmundy daiyndyq jasaýǵa baǵyttalǵan.
