Qazaqstan EAEO shartynyń buzýshylyqtaryn dáleldedi. Osylaısha Reseı-Belarýs shekarasyndaǵy qazaqstandyq tasymaldaýshylar úshin qoıylǵan tosqaýyl alynyp tastaldy. Olarǵa endi alty baqylaý-ótkizý pýnktteriniń qyzmeti qoljetimdi, dep habarlaıdy Dalanews.kz.

Bul týraly QR Saýda jáne ıntegrasıa mınıstrligi málimdedi.

Aıta ketsek, 2024 jylǵy 8 qańtardan bastap Reseı FQQ sheteldik, sonyń ishinde qazaqstandyq tasymaldaýshylarǵa shekaradan ótýge tolyq tyıym saldy. Bul Eýropa men Qazaqstan arasyndaǵy tranzıtti buǵattady.

"Jedel kelissózder nátıjesinde 12 qańtardan bastap "Ezerıshe-Nevel" (Lobok) shekara ótkeli ashyldy. Qazaqstan Eýrazıalyq ekonomıkalyq komısıaǵa shaǵymdanyp, Reseıdiń áreketi EAEO shartyna qaıshy ekenin dáleldedi. Komısıa tosqaýyldyń baryn rastady. Reseı vızalardy ózara taný týraly kelisim aıasynda shekteýdi alyp tastady. Endi shekara tek RF men Belarýs azamattaryna ǵana emes, basqa elderge de ashyq. 25 aqpanda EEK shekteýdiń alynǵanyn resmı túrde rastady. Qazaqstandyq bıznes endi shekaradan erkin óte alady", delingen quzyrly mınıstrlik habarlamasynda.

Qazaqstandyq tasymaldaýshylarǵa endi bul baǵytta alty baqylaý-ótkizý pýnkti qoljetimdi: Iýhovıchı – Dolosy, Ezerıshe – Nevel, Lıozno – Krýglovka, Redkı – Krasnaıa Gorka, Zvenchatka – Dýbovıchka, Selıshe – Novozybkov.

Buǵan deıin 1 aqpannan bastap Reseımen aradaǵy shekara beketteriniń biri ýaqytsha jabylatynyn jazǵanbyz.