Qazaqstan Qysqy Aziia oiyndaryn óz tarihynda ekinshi márte uiymdastyrmaq. 2029 jyly dúbirli doda Almatyda ótedi. Bul týraly Aziianyń Olimpiadalyq keńesi resmi málimdedi. Qabyldaýshy qala jónindegi kelisimshartqa 5 aqpanda Italiianyń Milan qalasynda qol qoiylmaq.
Atalǵan sheshim qoǵamda birqatar saýal týyndatty. Qazaqstan bul dodany ótkizýge qanshalyqty daiyn? Onyń el ekonomikasy men sport salasyna berer naqty paidasy qandai? Osy suraqtarǵa jaýap alý úshin Dalanews.kz redaktsiiasy sport sarapshysy Raýan Oqas pen ekonomist, R-Finance sarapshysy Arman Baiǵanovtyń pikirine júgindi.
Qabyldaýshy el nege aýysty?
Bastapqyda Qysqy Aziia oiyndary Saýd Arabiiasynda ótýi tiis bolǵan. Bul el 2022 jyly jarysty qabyldaý quqyǵyn ielengen. Alaida biyl qańtar aiynda Saýd Arabiiasynyń Olimpiadalyq komiteti jarysty ótkizýden bas tartty. Osydan keiin uiymdastyrýshy eldi aýystyrý týraly sheshim qabyldandy.
Xinhua agenttiginiń málimetinshe, jańa qabyldaýshy qala retinde Almaty tańdalǵan. Aita keteiik, Qazaqstan buǵan deiin de Qysqy Aziia oiyndaryn qabyldaǵan.
Sport sarapshysy ne deidi?
Sport sarapshysy Raýan Oqastyń aitýynsha, Qazaqstan Qysqy Aziia oiyndaryn ótkizýge infraqurylym turǵysynan daiyn.
“Biz 2011 jyly Aziia oiyndaryn, 2017 jyly Qysqy Ýniversiadany da ótkizdik. Sondyqtan tájiribemiz de, negizgi sport nysandarymyz da bar. Elimizdegi sporttyq infraqurylymnyń basym bóligi halyqaralyq talaptarǵa sai. Biz ozyq úlgidegi keshenderdi salyp, oǵan qyrýar qarjy jumsadyq. Sondyqtan bul joly Aziia oiyndaryn ótkizýge asa kóp qarajat qajet bola qoimaidy”, - deidi ol.
Onyń sózinshe, Qysqy Aziia oiyndary Olimpiada deńgeiindegi jarysqa jatpaidy, sondyqtan Qazaqstannyń bul dodany ótkizýge áleýeti jetkilikti.
“Alaida “bul jarys bizge kerek pe?” degen suraq týyndaidy. Ol bizdiń abyroiymyzdy qanshalyqty arttyrady, elge qanshalyqty paidasy bar? Osy máselelerge naqty jaýap berý qajet”, - deidi Raýan Oqas.
Sarapshynyń pikirinshe, halyqaralyq doda sporttyń damýyna belgili bir deńgeide áser etýi múmkin, alaida ony asa qajet joba dep baǵalaý qiyn.
“Buǵan deiin Qysqy Aziia oiyndary men Qysqy Ýniversiadany ótkizdik. Biraq sporttaǵy jaǵdaiymyz túbegeili jaqsardy dep aita almaimyz. Olimpiada oiyndarynan da turaqty túrde júlde alyp júrgen joqpyz. Bir jarysty bir ret ótkizýge bolady, al ony qaita ótkizýdiń qandai paidasy bar? Shyny kerek, mundai sheshimge ne sebep bolǵanyn túsine almadym. Qoryta aitqanda, Qysqy Aziia oiyndary bizge asa qajet dúnie emes dep oilaimyn”, - dep qorytyndylady ol.
Ekonomist pikiri
Sarapshy Arman Baiǵanovtyń pikirinshe, Qysqy Aziia oiyndaryn ótkizý belgili bir deńgeide qarjylai shyǵyndy qajet etedi. Alaida elimizde buryn salynǵan sporttyq infraqurylymnyń bar ekenin eskersek, kei nysandardy qaita paidalanýǵa múmkindik bar. Osy turǵyda jarysty ótkizý shyǵyny azaiýy múmkin.
“Buǵan deiin boi kótergen nysandardy tiimdi paidalanyp, az ǵana tolyqtyrýlarmen shektelsek, jarysty ótkizýge bolady. Eger barlyǵyn qaitadan nólden bastap salý qajet bolsa, bul biýdjetke aitarlyqtai salmaq túsirip, ózin-ózi aqtamaýy múmkin”, - deidi ekonomist.
Aitýynsha, mundai iri sporttyq is-sharalardyń ekonomikalyq emes, kóbine imidjdik máni joǵary. Kóptegen el qysqy halyqaralyq jarystardy ótkizýge umtylady. Sebebi bul týrister aǵynyn arttyryp, eldiń halyqaralyq deńgeidegi bedelin kúsheitedi. Osy tusta sarapshy Almaty qalasy men oǵan irgeles taýly óńirlerdiń týristik áleýetin de atap ótti.
“Jalpy, kez kelgen halyqaralyq sporttyq jarys halyqtardy jaqyndastyryp, eldiń tanymaldyǵyn arttyrady. Almaty - týristik áleýeti joǵary qala. Bul qonaqúi biznesine, qyzmet kórsetý salasyna jáne shaǵyn kásipkerlikke serpin berýi múmkin. Biraq tájiribe kórsetkendei, mundai jarystar árdaiym ózin tolyq aqtai bermeidi”, - deidi Arman Baiǵanov.
Sarapshy ekonomikalyq turǵydan áldeqaida qýatty memleketterdiń ózi keide osyndai iri jarystardy ótkizýden bas tartyp jatatynyn eske saldy. Sebebi bul biýdjetke aitarlyqtai salmaq túsirýi múmkin.
“Eger jumsalǵan qarajattyń kem degende bir bóligi salyq túsimderi nemese uzaq merzimdi ekonomikalyq paida arqyly qaitarylsa, onda mundai jobany júzege asyrýǵa bolady. Eń bastysy — jan-jaqty taldaý jasaý. Iaǵni, qansha qarjy jumsalatynyn jáne sol shyǵynnyń qanshasy keiin salyq túsimderi, týrizm men qyzmet kórsetý salasynyń damýy arqyly biýdjetke qaityp keletini eseptelýi tiis. Sondai-aq salynǵan infraqurylym jarystan keiin qalai paidalanylatyny da mańyzdy”, - deidi ol.
Arman Baiǵanov Qysqy Aziia oiyndarynyń sporttyq turǵyda oń áseri bolýy múmkin ekenin de joqqa shyǵarmaidy. Onyń aitýynsha, mundai jarystar qysqy sport túrleriniń damýyna serpin berip, salynǵan infraqurylym otandyq sportshylardy daiarlaýǵa uzaq ýaqyt boiy qyzmet ete alady.
