Qazaqstan Respýblikasynyń Syrtqy ister ministrligi Qara teńiz akvatoriiasynda Kaspii qubyry konsortsiýmynyń (KQK) infraqurylymy arqyly munai tasymaldaýǵa qatysqan azamattyq kemelerge jasalǵan ushqyshsyz ushý apparattarynyń shabýyldaryn qatań aiyptady, dep habarlaidy dalanews.kz.
Ministrliktiń málimdeýinshe, shabýyldar 2026 jylǵy 17 jáne 19 shildede bolǵan.
"Atalǵan shabýyldardy Qazaqstan Respýblikasynyń ekonomikalyq múddelerine jol berýge bolmaityn qol suǵýshylyq, sondai-aq zańdy halyqaralyq saýdany, jahandyq energetikalyq naryqtar men halyqaralyq kólik-logistikalyq jetkizý tizbekteriniń qaýipsizdigin turaqsyzdandyrýǵa baǵyttalǵan qasaqana áreketter retinde qarastyramyz", – delingen SIM málimdemesinde.
Vedomstvo Qara teńizdegi KQK terminaldaryna munai tieý úshin kirgen azamattyq kemeler týraly aqparat almasýdyń barlyq tarap aldyn ala kelisken tetiginiń ádeii saqtalmaǵanyna erekshe alańdaýshylyq bildirdi. Ministrliktiń málimetinshe, bul azamattyq kemeler ekipajdarynyń ómiri men qaýipsizdigine qater tóndirgen.
Sonymen qatar Qazaqstan shabýyldardy dereý toqtatýdy jáne qazaqstandyq kómirsýtek shikizaty eksporttalatyn infraqurylymnyń qaýipsizdigin qamtamasyz etý úshin jan-jaqty sharalar qabyldaýdy talap etti.
"Seriktes memleketterdi atalǵan shabýyldardy batyl aiyptaýǵa shaqyramyz jáne barlyq múddeli taraptardy naqty is-júzindegi sharalardy birlesip ázirleýge úndeimiz. Halyqaralyq quqyq normalaryn múltiksiz saqtaý ǵana osyndai oqiǵalardyń qaitalanýyna jol bermeidi dep esepteimiz", – dep málimdedi Syrtqy ister ministrligi.
SIM qazirgi ýaqytta keltirilgen zalalǵa jan-jaqty baǵalaý júrgizilip jatqanyn habarlady. Vedomstvonyń málimetinshe, onyń qorytyndysy boiynsha Qazaqstan halyqaralyq quqyqta kózdelgen barlyq tetikterdi, sonyń ishinde keltirilgen shyǵyndy óteý týraly talap qoiý quqyǵyn ózine qaldyrady.
Sondai-aq ministrlik Qazaqstan qaqtyǵystardy beibit jolmen retteýdiń balamasy joq ekenin ustanatynyn jáne halyqaralyq quqyq qaǵidattaryna, keme qatynasynyń erkindigine ári halyqaralyq kólik-logistikalyq jáne energetikalyq baǵyttardyń senimdi jumysyn qamtamasyz etýge beiildi ekenin atap ótti.
