Qazaqstan Qara teńizdegi tankerlerge jasalǵan shabýyldardan keiin Novorossiisk qalasyndaǵy Kaspii qubyr konsortsiýmy (KQK) teńiz terminalyna munai aidaýdy ýaqytsha toqtatty. Bul týraly Bloomberg agenttigi jaǵdaidan habardar derekkózderge silteme jasap habarlady, dep habarlaidy dalanews.kz.
KQK terminaly munai qabyldaýdy toqtatty
Agenttiktiń málimetinshe, Reseidiń Novorossiisk portyndaǵy KQK teńiz terminaly qubyr arqyly jetkiziletin munaidy qabyldamai otyr. Buǵan Qara teńizdegi tankerlerge jasalǵan birqatar shabýyldan keiin keme qatynasy kompaniialarynyń atalǵan aimaqqa kemelerin jiberýden bas tartýy sebep bolǵan. Bloomberg málimetine sáikes, munai qabyldaýdy toqtatý seisenbi kúni keshirek bastalýy tiis bolǵan.
Qazaqstan eksportyna áser etýi múmkin
Bul sheshim Qazaqstannyń negizgi munai eksporttaý baǵytyna tikelei áser etedi. Sebebi KQK arqyly elimiz óndirgen munaidyń basym bóligi álemdik naryqqa jóneltiledi. Terminal jumysynyń toqtaýy munaidy ári qarai tasymaldaý múmkindigin shektep, eldegi munai óndirisine de keri yqpal etýi yqtimal.
Aqparatqa sáikes, terminaldyń jumysy qubyr infraqurylymynyń zaqymdanýyna bailanysty emes. Negizgi sebep – teńiz tasymaldaýshylarynyń qaýipsizdikke alańdap, shabýyldardan keiin tankerlerdi terminalǵa jiberýden bas tartýy.
Tankerlerge shabýyl jasalǵan edi
Eske salaiyq, 2026 jylǵy 19 shildede KQK teńiz terminalynda munai tieý kezinde ASIA jáne NISSOS IOS tankerlerine shabýyl jasalǵan bolatyn. ASIA tankerinde órt shyǵyp, ol jedel sóndirildi. Zardap shekkender men munaidyń teńizge tógilýi tirkelmegenimen, munai tieý jumystary ýaqytsha toqtatylǵan edi.
Osy oqiǵadan keiin Qazaqstannyń Syrtqy ister ministrligi men Energetika ministrligi shabýyldardy aiyptap, mundai áreketter ekipaj músheleriniń qaýipsizdigine jáne halyqaralyq energetikalyq infraqurylymǵa qaýip tóndiretinin málimdegen.
Sonymen qatar Úkimet eldegi munai óńdeý salasyn keńeitý josparyn júzege asyryp jatyr. Atap aitqanda, Qazaqstandaǵy úsh iri munai óńdeý zaýytynyń qýatyn arttyrý jáne jylyna 10 mln tonna munai óńdeitin jańa zaýyt salý máselesi qarastyrylýda. Bul jumystar KQK teńiz terminalyndaǵy qaitalanǵan oqiǵalar aiasynda júrgizilip jatyr.
