Qazaqstannyń OPEK+ munaı óndirýshileri men eksporttaýshylary alánsy jaqyn aılarda óndirý kvotalaryn ulǵaıtady degen úmiti qaýip astynda qaldy, - dep habarlaıdy Dalanews.kz Qazaqstannyń qarjygerler qaýymdastyǵyna siltep.
Sebebi Qazaqstan qazirgi shekteýlerdi júıeli túrde saqtamaıdy jáne 2025 jyldyń qańtarynda bul shekteýler jeńildeıdi dep úmittengen edi.
Qazaqstan qarjygerler qaýymdastyǵy (QQQ) naryqtaǵy jaǵdaıǵa jasaǵan taldaýynda OPEK+ shıkizat óndirýdi arttyrý sheshimin taǵy da keıinge qaldyrýy múmkin ekenin atap ótedi. Bastapqyda munaı óndirý kvotalaryn uıym qyrkúıek aıynda ulǵaıtýǵa nıettengen, biraq bul sheshimdi qańtarǵa deıin shegergen bolatyn. Qazirgi ekonomıkalyq jaǵdaılarǵa baılanysty bul merzim taǵy da ózgerýi múmkin.
Álemdik munaı baǵasy taǵy da tómendeýde: 25 qarasha, dúısenbi kúngi saýda barysynda barreline 72,6 dollar boldy. Buǵan eki negizgi sebep bar.
Birinshiden, Izraıl men Lıvan arasynda beıbitshilik ornaıdy degen qaýeset taralyp, bul Taıaý Shyǵysta munaı óndirýdiń ósýine ákelýi múmkin.
Ekinshiden, AQSH Qarjy mınıstrliginiń jańa basshysy taǵaıyndaldy: Tramp ákimshiliginde bul qyzmetke slanestik munaı óndirýdi qoldaıtyn Skott Bessent kelmek. Osylaısha, munaı naryǵynda usynystyń aldaǵy ýaqytta kúrt artýyna áser etetin eki faktor baıqalady.
Osyndaı jaǵdaıda OPEK+ jeksenbi kúni ótetin kezdesýinde munaı óndirýdi ulǵaıtpaý týraly sheshim qabyldaýy múmkin. Bul degenimiz, Qazaqstanǵa karteldiń pozısıasy men óz múddesi arasynda qaıtadan manevr jasaýǵa týra keledi. Elge Teńiz ken ornyndaǵy qýattylyqtardy tolyq paıdalanýy úshin joǵaryraq kvota alý tıimdi bolar edi. Biraq OPEK+ munaı kvotalary Qazaqstan úshin uzaq jyldan beri sheshilmegen másele.
Elimiz kvotalardy júıeli túrde saqtamaıdy, al sheteldik sarapshylar bul ózge kartel múshelerin (eń aldymen Saýd Arabıasyn) ashýlandyrýy múmkin ekenin eskertýde. Bloomberg sholýshysy Haver Blas jaqynda bul jaǵdaıǵa baılanysty Qazaqstan 2025 jyly OPEK+ úshin «ishki jaýǵa» aınalýy múmkin ekenin málimdedi.
