Keiingi kezde Ózbekstan ózin jańa ekonomikalyq model usynýshy el retinde kórsetýde. Halyqaralyq forýmdarda serpindi damý, ashyqtyq, tsifrlandyrý týraly jii aitady. Biraq máseleniń túbine úńilseńiz, bir zańdylyqty baiqaýǵa bolady. Ózbekstan Qazaqstan áldeqashan júrip ótken joldy qaitalap keledi. Onysy óte durys. Sebebi Qazaqstan qazir ulttyq múddelerine tolyq sai keletin, teńgerimdi syrtqy saiasat ustanatyn jaǵdaiǵa jetti. Sondai-aq ádiletti álemdik tártip qalyptastyrýǵa úles qosyp keledi.
Ekonomikalyq kórsetkishterde Ózbekstandaǵy ishki jalpy ónim kóleminiń ósý qarqyny paiyzdyq turǵyda joǵary sekildi kórinedi. Resmi statistikany tereńirek zertteseńiz, másele múldem bólek. Byltyr Ózbekstan IJÓ-si 7,7 paiyzǵa ulǵaiyp, 147 milliard dollardy qurady. Al Qazaqstanda bul kórsetkish 6,5 paiyzǵa teńesti. Biraq ishki jalpy ónim kólemi 300 milliard dollardan asty. Budan bólek, jan basyna shaqqandaǵy tabys, eńbek ónimdiligi, ýrbanizatsiia deńgeii, qarjy naryǵy boiynsha Qazaqstan ázirge senimdi túrde alda.
Tsifrlandyrý máselesinde de jaǵdai uqsas. E-gov, tsifrly qyzmetter týraly kóp aitylady. Alaida júielik turǵydan alǵanda, Ózbekstandaǵy tsifrlandyrý ákimshilik baqylaýdan tolyq arylǵan joq. Qazaqstanda bul protsess qoǵam men bizneske áldeqaida tereń sińip, ekojúielik deńgeige shyqqan. Tipti, eýropalyqtardyń ózi onlain, qr arqyly tólemge tańǵalyp jatady.
Bul jerde negizgi másele Ózbekstanda emes. Kórshi eldiń reformalar júrgizýge talpynysy túsinikti ári durys qadam. Qazaqstan bul joldy áldeqashan júrip ótti. Syrtqy imidjge, túrli reitingterge sendi. Degenmen qazir basqarý sapasy, uzaq merzimdi damýǵa basymdyq beredi. Sondyqtan Qazaqstan aimaqtaǵy kún tártibin qalyptastyryp otyrǵan el. Al Ózbekstan soǵan beiimdelip, bizdiń júrip ótkenimizdi saralap, barynsha damyp kele jatqan memleket.
Pikir iesi: Aibar Oljaev
