Prezıdent Qasym-Jomart Toqaev Qazaqstan men Reseı arasyndaǵy ekijaqty jáne aımaqtyq yntymaqtastyqtyń negizgi baǵyttary týraly aıtty, dep habarlaıdy Dalanews.kz.
Memleket basshysy birinshi kezekte saýda jáne ındýstrıalyq baılanystardy damytýdyń mańyzyn atap ótti.
"Alǵashqy samıtte ekonomıkalyq yntymaqtastyqtyń jańa úlgisin qalyptastyrý baǵytynda jumys isteýge kelisken edik. Búgin qabyldanatyn Birlesken is-qımyl jospary 50-den asa sharany qamtıdy. Bul – óte qundy qujat. Sol sebepti ony ýaqtyly iske asyrýǵa barynsha kúsh jumyldyrý qajet. Ortalyq Azıa elderiniń Reseımen saýda kólemi barlyq taýar aınalymynyń úshten birin quraıdy. Ótken jyldyń qorytyndysy boıynsha bul kórsetkish 20 paıyz ósip, 50 mıllıard dollardan asty. Atalǵan kólemniń jartysynan kóbi Qazaqstan men Reseı arasyndaǵy saýdaǵa tıesili. Byltyr onyń kólemi 28 mıllıard dollarǵa jetti. Reseı Qazaqstan ekonomıkasyna qarjy quıǵan iri ınvestorlardyń qataryna endi. Investısıa kólemi 26 mıllıard dollardan asty. Byltyrdyń ózinde Reseıden tikeleı keletin ınvestısıa aǵyny 33 paıyz ulǵaıyp, 4 mıllıardtan asa dollarǵa kóbeıgen. Oǵan ónerkásip kooperasıasyn jedel damytý múmkindik berdi. Jalpy quny 21 mıllıard dollardy quraıtyn 114 ınvestısıalyq joba júzege asyryldy. Qazirgi ýaqytta 33 joba boıynsha jumys júrip jatyr. Onyń ınvestısıa kólemi 4,5 mıllıardtan astam dollardy quraıdy", – dedi Memleket basshysy.
Toqaevtyń sózinshe, eki el saýda kedergilerin azaıtyp, ózara almasýdy kúsheıtýge jáne taýar aınalymynyń nomenklatýrasyn keńeıtýge múddeli.
"Shekaralyq saýda aımaǵyn qurý, turaqty túrde shekaralyq aımaqtyq forýmdar, bıznes-forýmdar, kórmeler men jármeńkeler ótkizý, elektrondyq saýda alańyn damytý bul mindetterdi sheshýge yqpal etedi. Qazirgi ýaqytta Ortalyq Azıada birlesken saýda-ónerkásip aımaqtary men ındýstrıaldyq habtar qalyptasa bastady. Bul alańdarda óndiris lokalızasıasyna, qosylǵan qunnyń barlyq tizbegi boıynsha kooperasıaǵa jáne turaqty tasymaldy qamtamasyz etýge jaǵdaı jasalady. Reseılik bıznestiń atalǵan jobalarǵa qatysýy Reseı taýarlarynyń bizdiń, sonyń ishinde Qazaqstan naryǵynda uzaq ýaqyt boıy aınalymda bolýyna yqpal etedi", – dedi Prezıdent.
