Oljas Bektenov Xinjiang Lihua basshysy Chjan Sıhaımen quny 200 mlrd teńgeden astam maqta-toqyma klasterin qurý máselesin talqylady, – dep habarlaıdy Dalanews.kz
Qazaqstan Respýblıkasynyń Premer-mınıstri Oljas Bektenov Qytaıdyń Xinjiang Lihua (Group) Co., Ltd kompanıasy dırektorlar keńesiniń tóraǵasy Chjan Sıhaımen kezdesti. Túrkistan oblysyndaǵy TURAN arnaıy ekonomıkalyq aımaǵynda maqta-toqyma klasterin qurý jónindegi ınvestısıalyq jobany iske asyrý barysy qaraldy.
Joba maqta ósirýden bastap ıirilgen jip, mata, kıim túrindegi basqa da daıyn toqyma ónimderin shyǵarýǵa deıin óndiristiń tolyq sıklin, ıaǵnı, maqta agroónerkásibi keshenin qalyptastyrýǵa baǵyttalǵan. Egis alqaptaryna 50 myń gektardan astam jer bólindi, 10 zaýyt salý josparlanyp otyr, onyń ishinde 4-eýi egis alqaptaryna jaqyn maqta óńdeý boıynsha, 2-eýi – zamanaýı sý únemdeý tehnologıalaryn qoldana otyryp, tamshylatyp sýarý júıelerin óndirý boıynsha, sondaı-aq tigin jáne boıaý-árleý fabrıkasyn qosa alǵanda, 4 toqyma zaýyty bar. Investısıalardyń jalpy somasy 200 mlrd teńgeden asady. 4 myńnan astam jumys ornyn, onyń ishinde 3 myń turaqty jumys ornyn ashý kózdelgen.
Búginde klasterdiń qajettilikterin qamtamasyz etý úshin PVH qubyrlaryn shyǵaratyn zaýyt iske qosyldy, toqyma fabrıkalarynyń qurylysy bastaldy. Investor sýarý ınfraqurylymynyń (kanaldar jelisi, sorǵy stansasy) qurylysyn júrgizýde.
Xinjiang Lihua (Group) Co., Ltd kompanıasy dırektorlar keńesiniń tóraǵasy Chjan Sıhaı elimizdegi qolaıly ınvestısıalyq ahýaldy jáne joba úshin óńirdiń tıimdi klımattyq erekshelikterin atap ótti. Chjan Sıhaı bıylǵy qazan aıynan bastap daıyn ónimniń alǵashqy óndirisin iske qosý josparlanyp otyrǵanyn habarlady.
Premer-mınıstr Oljas Bektenov iske asyrylyp jatqan jobanyń mánin jáne ekonomıkany damytýdaǵy klasterlik tásildiń mańyzdylyǵyn atap ótti. Túrkistan oblysy – Qazaqstannyń maqta ósiretin jalǵyz óńiri.
«Memleket basshysy ekonomıkany ártaraptandyrý jáne naqty sektorǵa ınvestısıa tartý mindetin qoıdy. Maqta-toqyma klasterin qurý ónimniń qosylǵan qunyn arttyrýǵa, qaıta óńdeýge jáne elimizdiń eksporttyq áleýetin arttyrýǵa basa nazar aýdara otyryp, aýyl sharýashylyǵy óndirisin damytýǵa yqpal etedi. Úkimet óz tarapynan qajetti qoldaý kórsetedi»,- dedi Oljas Bektenov.
Xinjiang Lihua (Group) Co., Ltd – Qytaıdyń maqta ónerkásibindegi eń iri kompanıalardyń biri. Shyńjań kompanıasy qytaılyq 500 iri aýylsharýashylyq kásiporyndarynyń reıtıńinde 55-shi orynda tur. Kompanıa tuqym ósirýden bastap, toqyma ónimderin shyǵarýǵa deıingi maqtany keshendi óńdeýge jáne tolyq óndiristik sıkldy basqarýǵa mamandanǵan.
