Qazirgi ýaqytta Pákistannyń Islamabad qalasynda Qazaqstan Respýblikasynyń Týrizm jáne sport ministrligi men jetekshi sport federatsiialary ókilderinen quralǵan delegatsiianyń jumys sapary ótip jatyr. Sapar Pákistan Islam Respýblikasyna josparlanǵan memlekettik saparǵa daiyndyq aiasynda uiymdastyrylǵan, dep habarlaidy Dalanews.kz.
Jumys saparynyń negizgi maqsaty – Qazaqstan men Pákistan arasyndaǵy sport salasyndaǵy ekijaqty yntymaqtastyqty keńeitý, birlesken jobalardy iske qosý jáne sporttyq diplomatiiany damytý.
Qazaqstan delegatsiiasynyń quramynda QR Týrizm jáne sport vitse-ministri Baýrjan Rapikov, ministrlik ókilderi, sondai-aq greppling, qazaq kúresi, toǵyzqumalaq, shahmat jáne boks federatsiialarynyń basshylary men tanymal sportshylar bar. Delegatsiia qatarynda álem jáne Aziia chempiondary, halyqaralyq dárejedegi sport sheberleri de qatysyp jatyr.
Búgin, 3 aqpanda, Islamabad qalasyndaǵy Pakistan Sports Board bazasynda ornalasqan Qazaqstan–Pákistan «Dostyq» sport ortalyǵynyń saltanatty ashylýy ótýde. Ashylý rásimi aiasynda eki eldiń memlekettik ánurandary oryndalyp, Pákistannyń mejprovintsiialyq úilestirý jónindegi federaldy hatshysy men QR Týrizm jáne sport vitse-ministri quttyqtaý sóz sóileýde. Sonymen qatar qazaqstandyq jáne pákistandyq sportshylardyń kórsetilimdik beldesýleri uiymdastyrylyp, shahmat pen toǵyzqumalaq synyptarynyń jumysy tanystyrylyp jatyr.
Sapar barysynda birqatar mańyzdy qujattarǵa qol qoiý josparlanǵan. Atap aitqanda, Qazaqstan–Pákistan «Dostyq» sport ortalyǵyn qurý týraly memorandým, 2026 jylǵa arnalǵan sporttyq is-sharalardyń jol kartasy, sondai-aq qazaq kúresi men kabaddi federatsiialary arasyndaǵy ózara yntymaqtastyq týraly memorandýmdarǵa qol qoiylmaq.
Resmi kezdesýlermen qatar, qazaqstandyq delegatsiia Islamabad qalasyndaǵy «Lok Virsa» halyqtyq mura mýzeiin jáne Pákistan monýmentin aralap jatyr. Sondai-aq pákistandyq taraptyń uiymdastyrýymen resmi qabyldaýlar men jumys kezdesýleri ótýde.
Atalǵan jumys sapary Qazaqstan men Pákistan arasyndaǵy dostyq qarym-qatynasty nyǵaityp qana qoimai, ulttyq sport túrlerin halyqaralyq deńgeide ilgeriletýge, birlesken oqý-jattyǵý jiyndary men jarystar ótkizýge jańa múmkindikter ashyp otyr.
