قازىرگى ۋاقىتتا پاكىستاننىڭ يسلاماباد قالاسىندا قازاقستان رەسپۋبليكاسىنىڭ تۋريزم جانە سپورت مينيسترلىگى مەن جەتەكشى سپورت فەدەراسيالارى وكىلدەرىنەن قۇرالعان دەلەگاسيانىڭ جۇمىس ساپارى ءوتىپ جاتىر. ساپار پاكىستان يسلام رەسپۋبليكاسىنا جوسپارلانعان مەملەكەتتىك ساپارعا دايىندىق اياسىندا ۇيىمداستىرىلعان، دەپ حابارلايدى Dalanews.kz.
جۇمىس ساپارىنىڭ نەگىزگى ماقساتى – قازاقستان مەن پاكىستان اراسىنداعى سپورت سالاسىنداعى ەكىجاقتى ىنتىماقتاستىقتى كەڭەيتۋ، بىرلەسكەن جوبالاردى ىسكە قوسۋ جانە سپورتتىق ديپلوماتيانى دامىتۋ.
قازاقستان دەلەگاسياسىنىڭ قۇرامىندا ق ر تۋريزم جانە سپورت ۆيسە-مينيسترى باۋرجان راپيكوۆ، مينيسترلىك وكىلدەرى، سونداي-اق گرەپپلينگ، قازاق كۇرەسى، توعىزقۇمالاق، شاحمات جانە بوكس فەدەراسيالارىنىڭ باسشىلارى مەن تانىمال سپورتشىلار بار. دەلەگاسيا قاتارىندا الەم جانە ازيا چەمپيوندارى، حالىقارالىق دارەجەدەگى سپورت شەبەرلەرى دە قاتىسىپ جاتىر.
بۇگىن، 3 اقپاندا، يسلاماباد قالاسىنداعى Pakistan Sports Board بازاسىندا ورنالاسقان قازاقستان–پاكىستان «Dostyq» سپورت ورتالىعىنىڭ سالتاناتتى اشىلۋى وتۋدە. اشىلۋ ءراسىمى اياسىندا ەكى ەلدىڭ مەملەكەتتىك ءانۇراندارى ورىندالىپ، پاكىستاننىڭ مەجپروۆينسيالىق ۇيلەستىرۋ جونىندەگى فەدەرالدى حاتشىسى مەن ق ر تۋريزم جانە سپورت ۆيسە-مينيسترى قۇتتىقتاۋ ءسوز سويلەۋدە. سونىمەن قاتار قازاقستاندىق جانە پاكىستاندىق سپورتشىلاردىڭ كورسەتىلىمدىك بەلدەسۋلەرى ۇيىمداستىرىلىپ، شاحمات پەن توعىزقۇمالاق سىنىپتارىنىڭ جۇمىسى تانىستىرىلىپ جاتىر.
ساپار بارىسىندا ءبىرقاتار ماڭىزدى قۇجاتتارعا قول قويۋ جوسپارلانعان. اتاپ ايتقاندا، قازاقستان–پاكىستان «Dostyq» سپورت ورتالىعىن قۇرۋ تۋرالى مەموراندۋم، 2026 جىلعا ارنالعان سپورتتىق ءىس-شارالاردىڭ جول كارتاسى، سونداي-اق قازاق كۇرەسى مەن كاباددي فەدەراسيالارى اراسىنداعى ءوزارا ىنتىماقتاستىق تۋرالى مەموراندۋمدارعا قول قويىلماق.
رەسمي كەزدەسۋلەرمەن قاتار، قازاقستاندىق دەلەگاسيا يسلاماباد قالاسىنداعى «لوك ۆيرسا» حالىقتىق مۇرا مۋزەيىن جانە پاكىستان مونۋمەنتىن ارالاپ جاتىر. سونداي-اق پاكىستاندىق تاراپتىڭ ۇيىمداستىرۋىمەن رەسمي قابىلداۋلار مەن جۇمىس كەزدەسۋلەرى وتۋدە.
اتالعان جۇمىس ساپارى قازاقستان مەن پاكىستان اراسىنداعى دوستىق قارىم-قاتىناستى نىعايتىپ قانا قويماي، ۇلتتىق سپورت تۇرلەرىن حالىقارالىق دەڭگەيدە ىلگەرىلەتۋگە، بىرلەسكەن وقۋ-جاتتىعۋ جيىندارى مەن جارىستار وتكىزۋگە جاڭا مۇمكىندىكتەر اشىپ وتىر.
