«Dostyq» Qazaqstan–Pákistan sport ortalyǵy saltanatty túrde ashyldy. Bul shara QR Prezidenti Qasym-Jomart Toqaevtyń Pákistanǵa memlekettik sapary aiasynda ótti, dep habarlaidy Dalanews.kz.
2026 jylǵy 2–4 aqpan aralyǵynda Islamabad qalasynda Qazaqstan Respýblikasy Týrizm jáne sport ministrliginiń jáne Qazaqstan Respýblikasynyń Toǵyzqumalaq federatsiiasynyń ókilderi Pákistan Islam Respýblikasyna jumys saparymen bardy. Sapar Pákistanǵa josparlanǵan memlekettik saparǵa daiyndyq aiasynda uiymdastyryldy.
Sapardyń negizgi maqsaty – Qazaqstan men Pákistan arasyndaǵy intellektýaldyq sport túrleri, onyń ishinde toǵyzqumalaqty halyqaralyq deńgeide damytý, birlesken bilim berý jáne sporttyq jobalardy iske asyrý, sondai-aq sporttyq diplomatiiany nyǵaitý boldy.
Delegatsiia quramy
Qazaqstan tarapynan saparǵa QR Týrizm jáne sport vitse-ministri Rapikov Baýyrjan Serikbaiuly , ministrlik ókilderi, Qazaqstan Respýblikasynyń Toǵyzqumalaq federatsiiasynyń basshylyǵy men jetekshi sportshylary qatysty.
Delegatsiia quramynda Dúniejúzilik Toǵyzqumalaq federatsiiasynyń vitse-prezidenti– QR Toǵyzqumalaq Federatsiiasynyń prezidenti Ákim Tursun, toǵyzqumalaqtan 3 dúrkin Álem chempiony Serik Aqtaev, QR Toǵyzqumalaq federatsiiasynyń atqarýshy direktory Azamat Qaldybaev jáne halyqaralyq dárejedegi sport sheberleri, ulttyq ziiatkerlik sport túrin nasihattaýshy mamandar boldy.
Negizgi is-sharalar
3 aqpan kúni Islamabad qalasyndaǵy Pakistan Sports Board bazasynda ornalasqan Qazaqstan–Pákistan «Dostyq» sport ortalyǵy saltanatty túrde ashyldy.
Ashylý rásiminde Qazaqstan Respýblikasy men Pákistan Islam Respýblikasynyń memlekettik ánurandary oryndaldy. Pákistannyń provintsiiaaralyq úilestirý jónindegi federaldy hatshysy jáne QR Týrizm jáne sport vitse-ministri quttyqtaý sóz sóiledi. Osy jerde toǵyzqumalaq pen shahmat synyptarynyń resmi tanystyrylymy ótti. Qazaqstandyq mamandar toǵyzqumalaqtyń tarihy, erejeleri jáne halyqaralyq damý perspektivalary týraly baiandama jasady.
Sonymen qatar, Toǵyzqumalaqtan 3 dúrkin Álem chempiony Serik Aqtaev pákistandyq sportshylar men jattyqtyrýshylarǵa arnap sheberlik sabaǵyn ótkizdi. Sabaq barysynda oiynnyń strategiialyq erekshelikteri, oqý-jattyǵý ádistemeleri jáne halyqaralyq jarystarǵa daiyndyq tájiribesimen bólisti.
Qujattarǵa qol qoiý
Sapar barysynda intellektýaldyq jáne ulttyq sport túrlerin damytýǵa baǵyttalǵan kelesi mańyzdy qujattarǵa qol qoiyldy.
Qazaqstan–Pákistan «Dostyq» sport ortalyǵyn qurý týraly memorandým túzildi. Qazaqstan men Pákistan arasyndaǵy 2026 jylǵa arnalǵan sporttyq is-sharalar jol kartasy, onyń ishinde toǵyzqumalaq boiynsha birlesken týrnirler men oqý seminarlaryn ótkizý kelisildi. Toǵyzqumalaqty Pákistan aýmaǵynda damytýǵa baǵyttalǵan yntymaqtastyq jónindegi ýaǵdalastyqtar jasaldy.
Mádeni baǵdarlama
Resmi is-sharalarmen qatar, delegatsiia Islamabad qalasyndaǵy «Lok Virsa» halyqtyq mura mýzeiin jáne Pákistan monýmentin aralady. Pákistandyq áriptester tarapynan resmi qabyldaýlar men jumys kezdesýleri uiymdastyryldy.
Sapardyń mańyzy
Bul sapar Qazaqstan men Pákistan arasyndaǵy dostyq qarym-qatynasty nyǵaityp qana qoimai, toǵyzqumalaqty halyqaralyq deńgeide ilgeriletýge, birlesken oqý-jattyǵý jiyndaryn, týrnirler men bilim berý baǵdarlamalaryn ótkizýge jańa múmkindikter ashty.
Qazaqstan Respýblikasynyń Toǵyzqumalaq federatsiiasy úshin bul sapar ulttyq ziiatkerlik sport túrin Ońtústik Aziia aimaǵynda tanytý jolyndaǵy mańyzdy qadam boldy.
