Túrkistan oblysynda Louis Vuitton jáne Gucci sıaqty sán ındýstrıasynyń alyptarymen tikeleı yntymaqtastyqtaǵy toqyma fabrıkasy boı kótermek. Otandyq maqta sharýashylyǵyn jańa deńgeıge shyǵarýǵa múmkindik beretin jobanyń quny 146,8 mlrd teńgeni quraıdy, dep habarlaıdy Dalanews.kz.
Bolashaq maqta agroónerkásip kesheniniń kapsýlasyn salý rásimi Turan arnaıy ekonomıkalyq aımaǵynda oblys ákimi Darhan Satybaldy men "Túrkistan maqta agroónerkásip kesheni" JSHS dırektory Súı Szeniń qatysýymen ótti.
Tolyq sıkldi toqyma fabrıkasynda 11 seh jumys isteıtin bolady: ıirý, mata óndirý, boıaý, óńdeý. Óndiris qýattylyǵy jylyna 13 myń tonna ıirimjip, 50 mln metr úı toqymasyn, 7 mln jıyntyq tósek ábzelderin quraıdy. Onyń aıasynda 2000-nan astam jumys orny qurylady.
Maqta-mata klasterin damytýǵa baǵyttalǵan óndiristik keshenniń qurylysyn Xinjiang Lihua (Group) Co. LTD júrgizedi.
"Jobanyń mańyzdy artyqshylyǵy kompanıanyń Louis Vuitton jáne Gucci sıaqty sán ındýstrıasynyń alyptarymen tikeleı yntymaqtastyǵy bolyp tabylady.
Bolashaqta made in Turkestan tigin jipteri men matalary osy brendterge satylatyn bolady", delingen QR ASHM habarlamasynda.
Túrkistan oblysy - Qazaqstannyń maqta ósiretin jalǵyz óńiri. "Maqta sharýashylyǵyn damytýdyń jáne maqta-toqyma klasterin qoldaýdyń 2027 jylǵa deıingi óńirlik jol kartasy" sheńberinde toǵyz maqta klasterin qurý josparlanýda, bul shıtti maqtanyń baǵasyna táýeldilikti tómendetýge múmkindik beredi. Oblys aýmaǵynda jyl saıyn 100 myń gektar jerge maqta egilip, 300 myń tonnadan astam ónim jınalady. Aldyńǵy qatarly tehnologıalardy engizý, qytaılyq tájirıbe boıynsha maqtanyń elıtalyq sorttaryn egý sýdy, energıany, resýrstardy tutynýdy ońtaılandyrýǵa jáne ónimdilikti 60-65 s/ga deıin arttyrýǵa múmkindik beredi.
2023 jyly óńirde "Cotton Maqta" JSHS maqta óńdeý zaýytynyń jobasy iske qosyldy. Kásiporyn zamanaýı qytaılyq jabdyqtarmen jabdyqtalǵan. Ótken jyly zaýyt 40 myń tonna shıtti maqta qabyldady.
Sonymen qatar, Qytaı men Ózbekstan ınvestorlarynyń qatysýymen quny 223,5 mlrd teńge bolatyn eki ınvestısıalyq joba iske asyrylýda.
