Qazaqstan máńgilikke qulash urǵan el
Táýelsizdikti jariialaǵan Prezident Nursultan Nazarbaev bastaǵan el-jurtymyz Máńgilik el bolýdyń alǵy sharttaryn túzip, jasampazdyq jolyna, damýdyń dańǵylyna tústi.
Men keshegi keńestik kezeńdi de elimizdiń táýelsizdigin alǵan kezeńdi de kózben kórip, ómirin basymnan keshken adammyn. Menińshe, óz qolymyz ózimizge jetip,óz igilimizge ózimiz ie bolǵan, ózge eldiń bodandyǵynan bosaǵan ýaqyttan asqan qýanysh joq. Elimizdiń erkindigine teń keletin baqyt joq. Bul oiymdy barsha qandastarymyz qoldaitynyna senimdimin.
Azattyq alǵan jyldar ishinde qabyldaǵan Ata Zańymyz múltiksiz oryndalyp keledi. Qarýly kúshterimiz quryshtai berik. Shekaramyz senimdi qolda.Tól teńgemiz qazynamyzǵa ainaldy. Shette júrgen qandastarymyz atajurtyna oralyp,júregi syzdap saǵynǵan baýyrlarymen tabysty. Qasymyzda azat, máz-meiram ómir-súrýde. Qansha márte atymyz báigeden keldi! Sportshylarymyz ben ónerpazdarymyzdy aitamyn. Qanshama ot tutanǵaly turǵan daýdy sheshtik! Elbasymyz-maqtanyshymyz, abyroiymyz! Munyń barlyǵy Qazaqstannyń irgeli el, aibyndy memleket bolyp qalyptasqanyn baiqatady.
Búgin biz Qazaqstannyń básekege qabileti joǵary, damyǵan 50 eldiń qataryna qosylǵanyn maqtanyshpen aitýymyz kerek. Osyndai damyǵan memleketterdiń sapynan kórinýimizge el ekonomikasynyń udaiy ósý ústinde bolǵany, kásipkerlik salasyna salasyna memleket tarapynan jetkilikti deńgeide qoldaý kórsetilgeni, syrtqy jáne ishki investorlar úshin tiimdi jaǵdailar jasalǵany, el dáýletin eseleýge as qajet adami kapitaldy damytý isiniń jolǵa qoiylǵany keń múmkindik bergenin bilip-tanýǵa jáne keńge jariialaýǵa tiispiz.
Men týyp-ósken Shardara topyraǵyn mysalǵa alsaq, aýlymyzdyń tek qana órkendegen, ósken jaǵyn kóre alasyz. Avtomobil joldary jóndeldi, qanshama shaqyrym joldar jańadan salyndy. Ainadai taza, taqtaidai túzý joldar qaida barsańyz da, kedergisiz qinamai jetkizedi. Oblys ortalyǵy Túrkistanǵa buryn tańerteń shyǵyp, keshke áreń jetseńiz, qazir ári ketse úsh saǵat ta kieli mekenge at basyn tireisiz. Jetisaiǵa baratyn jol da az ýaqyttyń ishinde qaita salynyp, ońtústikti qýanyshqa bóledi. Qala tóńiregi kún saiyn jańa qurylystarmen tolyǵyp, aýlymyzdyń ajary da mádenieti jańaryp, gúldenip, azat qazaq eliniń erteńgi kelbetin tanytýda. Barlyq mekemeler men mektepter sandy tehnologiiamen, internetpen qamtamsyz etilgen.
Aýdanymyzda kúndelikti ótip jatqan kóńildi is-sharalar men qyzyqty saiystar, baiqaýlar jergilikti halyqtyń berekesi men birliginiń jemisi tárizdi.
Taiaýda Elbasymyzdyń «Uly dalanyń jeti qyry» atty qundy eńbegi jaryq kórdi. Oqyp shyqsańyz kenen oilarǵa kenelip, keshegimizdi eske alyp, erteńimizge qyzyǵa qaraisyz. Máńgilik el bolýǵa baǵyt alǵan, uly dalanyń urpaqtary úshin baǵa jetpes sabaq bolardyq qazynany qaitalap oqyp, ainalańyzben taldap, ulan-asyr tapsyrmany oryndaýǵa úles qosqyńyz keledi. Ulttyq murany qurmettep, urpaqqa jalǵastyryp,tarihymyzdyń tamyryn keńga jaiý árbir azamattyń mindeti ekenin tereń túsinesiz. Kerýenimiz kúnge bet aldy. Kóshbasshymyz - el kósemi Nursultan Nazarbaev. Qundylyǵymyzdy qunttap, qýanyshymyzdy jalǵap, el kóshine súieý bolyp, qairat qosaiyq, aǵaiyn!.
Men tóraǵalyq etetin Shardara aýdandyq ardagerler qoǵamynyń músheleri de el táýelsizdiginiń mańyzy men mártebesin, elbasymyzdyń qadir-qasietin, álemdegi abyroiy men bedelin dáripteýde birshama úles qosyp keledi. Alda da qazynaly qarttarymyz jastarmen, ár ult ókilderimen osy baǵyttaǵy is-sharalardy aianbai atqara beredi dep kópshilikti sendiremin.
Búgin maqtanatyn da, baq tabatyn da kún! Muraty máńgi, maqsaty biik,otany bir Táýelsiz eldiń ulttyq merekesi qutty bolsyn!
Júregi adal, nieti taza qazaq halqynyń aspany ashyq, tirligi baiandy, mereii ústem bolsyn!
Toqsanbai BERDIBEKOV, Shardara aýdandyq ardagerler keńesiniń tóraǵasy.
