Memleket basshysy biylǵy halyqqa Joldaýynda saiasi jańǵyrý týraly aýqymdy baǵdarlama usyndy. Joldaýda aitylǵan bastamalardyń negizgi maqsaty – halyqtyń kóp jylǵy talap-tileginen týyndaǵan másele – saiasi júiemizdi túbirimen ózgertý boldy. Muny tiimdi júzege asyrý úshin Ata zańymyzǵa ózgerister engizý qajet.
Memleket basshysy Qazaqstannyń odan ári damýy saiasi reformalarsyz múmkin emes ekenin málimdedi. Osy baǵytty ustanyp, «Halyq únine qulaq asatyn memleket» saiasatyn júzege asyra otyryp, Prezident Qasym-Jomart Toqaev Konstitýtsiiaǵa ózgertýler men tolyqtyrýlar engizý máselesi boiynsha referendým jariialady.
Konstitýtsiia – memlekettik qurylymdy aiqyndaityn, azamattardyń ómiriniń barlyq salalaryn retteitin jáne barlyq deńgeidegi zańdardyń odan ári qabyldanýyna negiz bolatyn basty qujat bolsa, Referendým tikelei demokratiia quraly, azamattardyń erik-jigeriniń mańyzdy protsesi. Ol qoǵamda qalyptasqan qaǵidattardy ózgertetin sheshimderdi qabyldaýǵa halyqty tartý arqyly jańa saiasi mádenietti qalyptastyrady.
Elimizdiń odan ári damý baǵytyn azamattar sheshýi kerek. Onyń ústine, osyndai mańyzdy máseleni referendýmǵa shyǵarý – biliktiń halyqqa degen seniminiń kórsetkishi, bilik pen árbir azamattyń ózara is-qimyl kópirlerin qurýdyń ólshemi. Referendým ótkizý – biliktiń ǵana emes, halqymyzdyń kemeldiliginiń kórsetkishi.
Biz bárimiz bir el bolyp Jańa Qazaqstandy, Ádiletti Qazaqstandy quramyz, árbir azamattyń quqyǵy qorǵalatyn memleket bolamyz. Bárine birdei múmkindik beriledi. Árkim qarym-qabiletine sai qoǵamnan óz ornyn ielenedi. Halyqtyń oi-sanasy jańǵyryp, ómir salty ózgeredi. Biz memlekettik júieni jetildirip, qoǵam men biliktiń tiimdi dialogyn ornatamyz.
Osylaisha, Ekinshi Respýblikany qalyptastyramyz. Konstitýtsiialyq reforma munyń bárin tabysty júzege asyrý úshin qajet.
Qazirgi reformanyń ereksheligi – Prezidenttiń ókilettigin kúsheitý emes, memleketimizdi jetildirý, jańǵyrtý jáne nyǵaitý. Biz referendýmǵa eldiń erteńi, urpaqtyń keleshegi úshin qatysamyz, ult múddesine sai bastamalardy qoldaimyz.
Referendým boiynsha Ata zań baptarynyń úshten biri ózgeredi. Konstitýtsiiamyz múlde jańa sipatqa ie bolady. Al mundai aýqymdy ózgeris búkil halyqtyń sheshimimen júzege asyrylýy tiis.
Aldaǵy referendým Qazaqstannyń bolashaǵyn aiqyndaidy. Konstitýtsiialyq reforma biliktiń ókildi tarmaǵyn aitarlyqtai kúsheitedi. Úilesimdi jáne teńgerimdi júieni nyǵaitady. Máslihattar yqpalyn arttyrady.
Konstitýtsiianyń jańarǵan nusqasynda Prezidenttiń barlyq saiasi kúshter men partiialardan derbestigin bekitý kózdelgen. Memleket basshysynyń jaqyn týystaryna saiasi laýazym ielenýge jáne kvazimemlekettik sektorda basshylyq qyzmet atqarýǵa tyiym salynady.
Sondai-aq quqyq qorǵaý salasy boiynsha mańyzdy ózgerister engiziledi. Atap aitsaq, Konstitýtsiialyq sot qurylady. Adam quqyqtary jónindegi ýákildiń, iaǵni ombýdsmenniń mártebesi Ata zańmen aiqyndalady. Elimizde ólim jazasy múlde joiylady. Munyń bári azamattardyń quqyqtary men bostandyqtaryn qorǵaý úshin jasalyp jatyr. Aldaǵy konstitýtsiialyq reforma el damýynyń jańa kezeńi bastalǵanyn kórsetedi.
Biz agrarly memleketpiz. Qazaqstannyń geosaiasattaǵy artyqshylyǵy onyń agrarlyq memleket qurýynda, iaǵni tamaq óndirý arqyly biz qaýipsizdigimizdi qamtamasyz ete otyryp, álemdegi erekshe ornymyzdy aiqyndaimyz. Osy kúnge deiin osy konstitýtsiiamyzdyń, elimizdegi beibitshiliktiń arqasynda sharýashylyǵymyzdy igerip, shamamyzǵa qarai damyp kelemiz.
Agrosaiasatta jaǵdai turaqsyz bolsa da, salamyz memlekettiń qoldaýynsyz qalǵan emes. Prezident te, Úkimet te bul salaǵa aitarlyqtai kóńil bóledi. Ol aldaǵy ýaqytta odan da ári qarqyndy damidy degen oidamyz. Eldegi beibitshilik arqasynda fermerler qansha azamatqa jumys ornyn taýyp berip jatyr, elde tynyshtyq bolsa áli de talai jumys ornyn ashady. Al osynyń barlyǵy el tynyshtyǵynyń dińgegi Konstitýtsiiamyzdyń myǵym bolýynyń arqasynda.
Sondyqtan árbir el azamaty daýys berip, osy tarihi betburysty jasaýǵa óz úlesin qosýy tiis.
Biz Jańa, ádiletti Qazaqstandy damytqanda ǵana qaryshtap alǵa damimyz, tutynýshy elden óndirýshi elge ainalamyz.
Elimizdiń jarqyn bolashaǵy – óz qolymyzda! Kúshimiz – birlikte! Birge bolaiyq! Bereke-birligimizdi nyǵaitaiyq!
Qazaqstan fermerleriniń qaýymdastyǵy
