Halyqaralyq valiýta qory (HVQ) Qazaqstan ekonomikasynyń 2026 jylǵy ósimine qatysty jańa boljamyn jariialady. Uiymnyń málimetinshe, elimizdiń jalpy ishki ónimi 2026 jyly 4,6%-ǵa, al 2027 jyly 4,4%-ǵa ósedi, dep habarlaidy dalanews.kz.
Bul týraly HVQ jariialaǵan «Álemdik ekonomikanyń damý perspektivalary» (World Economic Outlook) baiandamasynda aitylǵan.
HVQ sarapshylarynyń pikirinshe, qazirgi tańda álemdik ekonomikaǵa qarama-qarsy baǵytta áser etip otyrǵan eki negizgi faktor bar. Birinshisi – Taiaý Shyǵystaǵy soǵys saldarynan týyndaǵan usynys tapshylyǵy. Bul ásirese energiia resýrstaryn importtaityn jáne ekonomikasy álsiz memleketterdiń ósimine keri yqpal etip otyr.
Ekinshi faktor – jasandy intellekt tehnologiialarynyń qarqyndy damýyna bailanysty jahandyq tehnologiialyq tsikldiń jedeldeýi. Sarapshylardyń aitýynsha, tehnologiialyq óndiris tizbegine kirikken elderde, tipti energiia importtaityn memleketterdiń ózinde de ekonomikalyq belsendilik joǵary deńgeide saqtalýda.
Al tehnologiialyq óndiris tizbegine az qatysatyn ári energiia importtaityn kóptegen tómen tabysty elderde ekonomikalyq ósim baiaýlaýy múmkin.
HVQ boljamynsha, álemdik ekonomika 2026 jyly 3%-ǵa, al 2027 jyly 3,4%-ǵa ósedi. Sonymen birge jahandyq infliatsiia 2025 jylǵy 4,1%-dan 2026 jyly 4,7%-ǵa deiin joǵarylap, keiin 2027 jyly 3,9%-ǵa deiin tómendeidi.
Sarapshylar munai baǵasynyń da aitarlyqtai ózgeretinin boljaidy. HVQ esebine sáikes, munai baǵasy 2026 jyly 31,8%-ǵa ósse, 2027 jyly 11,8%-ǵa tómendeýi múmkin.
Al Taiaý Shyǵys pen Ortalyq Aziia óńiri boiynsha ekonomikalyq ósim 2026 jyly nebári 0,7% bolady dep kútilýde. Alaida 2027 jyly óńir ekonomikasynyń ósimi 6,5%-ǵa deiin jedeldeidi.
