Otyrysta Memleket Basshysy Ujymdyq qaýipsizdik shart uiymyna qatysýshy memleketter bitimgerlik kúshteriniń 2 kúnnen keiin elimizden kezeń-kezeńimen shyǵarylatyndyǵyn málimdedi.
Sonymen qatar, qaqtyǵystar kezinde qaitys bolǵan áskeri qyzmetshilerdiń, politsiia qyzmetkerleriniń jáne beibit turǵyndardyń otbasylaryna turǵyn úi, oqý, áleýmettik kómek kórsetiletindigin atap ótti.
Qysqa merzim ishinde elimiz qalypty ómirge qaita keletindigin jáne qarjy júiesi men kólik salasynyń, azyq-túlik jetkizý isiniń esh kedergisiz jumys isteýin qamtamasyz etý boiynsha naqty jumystar atqarylyp jatqandyǵyn atap ótti.
Prezident óz baiandamasynda elimizde oryn alǵan qaqtyǵys saldarynan týyndaǵan qiyndyqtardy eńserý joldary men halyqtyń áleýmettik jaǵdaiyn jaqsartý máseleleri men olardy sheshýdiń baǵyt-baǵdaryn aiqyndady.
Osy maqsatta, jańadan taǵaiyndalǵan Qazaqstan Respýblikasynyń Premer-Ministri Álihan Ashanuly Smaiylovqa naqty tapsyrmalar júktedi.
Elimizdegi quqyq qorǵaý organdary júiesine túbegeili reforma jasap, olardyń jaýyngerlik daǵdylary men daiyndyǵyn kúsheitý, materialdyq-tehnikalyq bazasyn jaqsartý, jastardy Otan aldyndaǵy boryshyn óteýge yntalandyrý máselelerin iske asyrýdy mindettedi.
Bilim, densaýlyq saqtaý, jumyspen qamtý syndy barlyq áleýmettik salalarǵa kúrdeli ózgerister engizip, «Áleýmettik kodeks» qabyldaýdy tapsyrdy.
Ásirese, bilim salasyn damytýdy, onyń ishinde tehnikalyq mamandandyrylǵan sheteldik bedeldi, iri oqý ordalarynyń filialdaryn ashýdy jáne halyq kóp shoǵyrlanǵan óńirlerde memlekettik grant sanyn kóbeitýdi tapsyrdy.
Bul óz kezeginde elimizdegi bilim salasynyń damýyna jáne oqýǵa yntaly biraq, qarjylyq múmkindigi shekteýli jastardyń bilim alýyna aitarlyqtai kómek bolady dep oilaimyn.
Sonymen qatar, Prezident «Qazaqstan halqyna» dep atalatyn jańa qoǵamdyq áleýmettik qor qurylatynyn erekshe atap ótti. Bul qordyń qarajaty halyqaralyq ólshemder boiynsha óte bai sanalatyn adamdar men tabysy joǵary kompaniialardyń jáne sheteldik qorlardyń bóletin jyl saiynǵy jarnasy esebinen qalyptystyrylady.
Atalǵan qor sirek kezdesetin aýrýlary bar balalarǵa, áleýmettik jaǵdaiy aýyr otbasylarǵa kómek kórsetetin bolady.
Sondai-aq, Memleket Basshysy halyqtyń tabysyn arttyrý týraly baǵdarlama ázirleýdi usyndy.
Memleket Basshysy óz baiandamasynda halyqtyń kóptep tutynýshylyq nesie alyp, qaryzǵa batyp jatqandyǵyn, sonyń saldarynan olardyń áleýmettik jaǵdaiy nasharlap, munyń sońy qoǵamdyq kúizeliske ákelip jatqandyǵyn úlken ókinishpen aitty.
Sondyqtan, qarjy júiesiniń jumysyna da basa nazar aýdarý – mańyzdy máseleniń biri bolyp otyr. Memleket Basshysy osy oraida, Úkimetke «Jeke tulǵalardyń bankrottyǵy týraly» Zań jobasyn ázirleýdi tapsyrǵandyǵyn jetkizdi.
Odan bólek, Qazaqstandaǵy jyl saiynǵy infliatsiia 2025 jylǵa qarai 4 paiyzdan aspaýy kerektigine basa nazar aýdara otyryp, ony baqylaý boiynsha Úkimet pen Ulttyq bankke jedel sharalar keshenin ázirleýdi tapsyrdy.
Sondai-aq, aldaǵy ýaqytta elimizde ýtilizatsiialyq alym toqtatylyp, onyń quny qaita esepteledi. Memleket basshysy úkimetke osyny retteýdi tapsyrdy. Endi buǵan deiin bul sharýamen ainalysyp kelgen biryńǵai operatordyń jumysy toqtatylyp, ýtilizatsiialyq alymdy jinaý shet elderdegi syndy memleket qaraýyna ótetindigin, sondai-aq otandyq mashina jasaýshylarǵa qoldaý toqtamaityndyǵyn erekshe atap ótti. Kerisinshe júie qaita jasalyp, ýtilizatsiialyq alymnan túsken qarjy esebinen Qazaqstanda jasalǵan kólik satyp alǵandarǵa vaýcher beriledi. Buǵan qosa, jinalǵan qarjyny qoǵamǵa tiimdi jaratýdyń tyń joldary da qarastyrylatyndyǵyn jetkizdi.
Barlyǵymyz biletindei, sońǵy jyldary qýańshylyq saldarynan aýyl sharýashylyǵy salasy úlken shyǵynǵa ushyrady. Bul jóninde Prezidentimiz qýańshylyqtyń saldarynan jinalǵan astyq kólemi 4 mln. tonnaǵa kemigendigin, atalǵan másele shikizat jáne jemshóppen qamtý isine keri áser etetindigin aitty.
Aýyl sharýashylyǵy salasyn damytýǵa erekshe nazar aýdarý kerektigin jetkizdi. Ol biyl da ahýal kúrdeli bolýy múmkin dei kele, Úkimetke tuqymmen, jem-shóppen, tyńaitqyshpen qamtý isin jáne egin egý naýqanyn qatań baqylaýda ustaýdy tapsyrdy.
Osy oraida, sýbsidiia máselesine jeke toqtaldy. «Sýbsiiadiianyń qoljetimdigi men ony alýdaǵy protsedýranyń ashyqtyǵyn qamtamasyz etý kerekpiz» - dedi, Prezident.
Ol memleketimizdiń áleýmettik-ekonomikalyq damýy men onyń saiasi turaqtylyǵyn qamtamasyz etýde memlekettik organdarǵa júktelgen mindetterdiń jedel ári sapaly oryndalýyn tapsyrdy.
Osy jumystardy atqarýǵa eń birinshi elimizge tynyshtyq kerek. Ony sońǵy kúnderi bolǵan qaiǵyly oqiǵalardan soń barlyǵymyz jete túsinip, ańǵardyq.
Memleket Basshysy óz baiandamasynyń sońynda: «Qiyn kúnder artta qaldy. Osy sátte el taǵdyry úshin uiysa bilgen búkil halqyma shynaiy rizashylyǵymdy bildiremin! Bárimiz bul oqiǵadan sabaq alýymyz kerek. Eń bastysy, bereke-birlikti, tynyshtyq pen turaqtylyqty saqtaýymyz qajet. Endi, Qazaqstanda damýdyń jańa kezeńi bastalady. Bul shynaiy jańarý kezeńi bolady. Egemen elimizdi birge órkendeteiik! Halqymyz úshin Táýelsizdik bárinen qymbat. Jańa Qazaqstandy Birge quraiyq!»- dep, aityp ótti.
Memleket Basshysy atap ótkendei, Qazaqstannyń shynaiy jańarý kezeńine sátti qadam basýy jolynda aldymyzǵa qoiylyp otyrǵan tapsyrmalar men mindetterdi búkil qoǵam bolyp jumyla atqarýymyz mańyzdy.
Barshamyzǵa aian qai bir qoǵam, qai bir memleket bolmasyn damýdyń joǵary satysyna tek yntymaǵy yrysty, birligi bekem bolǵan jaǵdaida ǵana jete bilgen.
Endeshe, «Birlik joq bolsa, uiym joq, uiym joq bolsa, kúiiń joq» - dep, dana babalarymyz aitqandai, birligimizdi bir arnaǵa jumyldyryp, jańarǵan Qazaqstandy qurýda bar kúsh-jigerimizdi salaiyq, ardaqty áleýmet.
Bizdiń kúshimiz – birlikte, qýatymyz – yntymaqta.
Qairat BALABIEV, Túrkistan oblystyq máslihatynyń hatshysy
