Qazaqstan fýtbol federatsiiasy da quramyna kiretin ÝEFA-nyń 55 ulttyq qaýymdastyǵy FIFA týrnirlerine boikot jariialaý týraly ortaq sheshimdi qoldady, dep habarlaidy dalanews.kz.
Eýropalyq fýtbol qaýymdastyqtarynyń odaǵy (ÝEFA) FIFA-nyń álem chempionatynyń kommertsiialyq quqyqtarynyń bir bóligin jeke investorlarǵa berý josparyna qarsy shyqty. Eger bul bastama júzege assa, uiym FIFA uiymdastyratyn barlyq týrnirlerge, sonyń ishinde álem chempionatyna boikot jariialaitynyn málimdedi.
Daýǵa FIFA prezidenti Djanni Infantino usynǵan jańa kommertsiialyq joba sebep boldy. Josparǵa sáikes, álem chempionaty men ózge de týrnirlerdi basqaratyn jańa kommertsiialyq qurylym qurylyp, onyń 20%-ǵa deiingi úlesi jeke investitsiialyq qorlarǵa satylýy múmkin.
ÝEFA mundai qadam fýtboldyń táýelsizdigine qaýip tóndiredi dep esepteidi. Uiym álem chempionaty kommertsiialyq aktivke ainalmaýy tiis ekenin aityp, FIFA-dan bul jospardan tolyq bas tartýdy talap etti.
Qazaqstan bul máselege qatysty jeke málimdeme jasaǵan joq. Alaida Qazaqstan fýtbol federatsiiasy ÝEFA quramyndaǵy 55 ulttyq qaýymdastyqtyń biri bolǵandyqtan, qabyldanǵan ujymdyq sheshimniń qatysýshysy sanalady.
Óz kezeginde FIFA usynystyń áli talqylaý kezeńinde ekenin aityp, barlyq múshe qaýymdastyqtyń pikirin eskerýge daiyn ekenin málimdedi. Uiym jospar júzege asqan jaǵdaida da týrnirlerge baqylaý óz qolynda qalatynyn alǵa tartýda.
Bul sońǵy jyldardaǵy FIFA men ÝEFA arasyndaǵy eń iri teketiresterdiń biri retinde baǵalanyp otyr.
