Qazaqstan Beıbitshilik keńesine bir mıllıard dollar kóleminde jarna tólemeı-aq múshe boldy. Bul týraly Aqordanyń baspasóz qyzmeti málimdedi, dep habarlaıdy Dalanews.kz.

Resmı málimetke súıensek, keńes jarǵysynda kórsetilgen 1 mlrd AQSH dollary kólemindegi erikti jarna múshelikke kirýdiń mindetti sharty emes. Bul - árbir memlekettiń óz erkine baılanysty sheshim.

Mundaı jarna alǵashqy bir jyl ishinde tólense, memleket keńestegi músheligin belgilengen úsh jyldyq merzimnen uzartý múmkindigine ıe bolady.

"Beıbitshilik keńesine kirý úshin memlekettiń óz sheshimi ǵana qajet. Keńeske múshe bolǵan sátten bastap eldiń múshelik etý merzimi - úsh jyl", – dep jazylǵan habarlamada.

Osylaısha Qazaqstan Beıbitshilik keńesine eshqandaı qarjylyq jarnasyz qosylǵan. Bul qadam keńes jarǵysynyń talaptaryna tolyq sáıkes keledi.

Eske salaıyq, 22 qańtarda Memleket basshysy Qasym-Jomart Toqaev AQSH prezıdenti Donald Tramptyń bastamasymen qurylǵan Beıbitshilik keńesiniń jarǵysyna qol qoıdy.

Qol qoıý rásimine Qazaqstan Prezıdentinen basqa 18 eldiń basshylary men ókilderi qatysty.