Qarjy naryǵyn retteý jáne damytý agenttigi 2024 jyly 11 bankke qadaǵalap stress-testileýdi (QST) ótkizdi. Olardyń úlesine barlyq aktivterdiń 85%-y jáne eldiń bank sektorynyń jiyntyq kredittik portfeliniń 86%-y tiesili, dep habarlaidy Dalanews.kz.
2024 jylǵy strestik-testileýdi ótkizý úshin Ulttyq Bankpen birlesip bazalyq jáne strestik stsenariiler ázirlengeni naqtylanady. Strestik stsenarii álemdik ekonomikalyq kúizelister men negizgi salalardaǵy quldyraý jaǵdaiynda ekonomikadaǵy jaǵymsyz ózgeristerdi boljady.
"QST qorytyndysy boiynsha 11 banktiń jiyntyq negizgi kapitalynyń jetkiliktilik deńgeii 15,0%-dy qurady, bul eń tómengi belgilengen 5,5%-dan (býferlerdi esepke almaǵanda) edáýir asyp túsedi jáne bankterdiń joǵary kapitaldandyrylýyn jáne ekonomikalyq kúizelisterge ornyqtylyǵyn kórsetedi", delingen agenttik habarlamasynda.
Mamyrdan tamyzǵa deiingi ailar aralyǵynda daiyndyq is-sharalary ótkizildi, sonyń ishinde derekter jinaý, modelderdi kalibrleý, stsenariilerdi ázirleý jáne ádisnamany beiimdeý. QST-nyń negizgi kezeńi ótken jylǵy qyrkúiek – jeltoqsan ailary aralyǵynda aǵymdaǵy jylǵy 1-toqsanda nátijelerin bekitýmen ótti.
Aita keteiik, 2024 jyly bank sektory aktivteri 19,7%-ǵa (10,1 trln teńge) ósip, bankterdiń nesie portfelin jáne memlekettik baǵaly qaǵazdar portfelin ulǵaitý esebinen 61,6 trln teńgege jetti. NPL qaryzdarynyń deńgeii (90+) 3,1%-dy qurady. Qazaqstandaǵy bankterdiń keńeitilgen tizimi boiynsha tolyq aýqymdy qadaǵalaý stress-testileýi 2022 jyldan bastap jyl saiyn ótkizilip keledi.
