"2025 jyldyń basynan bastap "Bankter týraly" jańa zańdy ázirleý boiynsha aýqymdy jáne júieli jumys júrgizildi. Bul zań – sońǵy onjyldyqta qarjy sektorynda daiyndalǵan barynsha mańyzdy zańnamalyq qujattardyń biri". Bul týraly Qarjy naryǵyn retteý jáne damytý agenttigi tóraǵasynyń orynbasary Dáýren Sálimbaevtyń maqalasynda aitylady, dep habarlaidy Dalanews.kz.
Usynylǵan negizgi ózgeristerdi tizbektei kele, ol korporativtik basqarý boiynsha usynystarǵa da keńinen toqtalady. Jańa zań aktsionerlerden bastap bank ishindegi mamandandyrylǵan qyzmetterge deiingi basqarýdyń barlyq deńgeileri úshin naqty standarttardy belgileidi.
"Táýekelderdi basqarý, ishki baqylaý jáne komplaens bólimsheleriniń basshylary endi resmi túrde negizgi basshy qyzmetkerler retinde tanylady. Bul olarǵa basqarma múshelerine siiaqty qatań talaptar qoiylatynyn bildiredi: tájiribeniń, tiisti bilimniń, iskerlik bedeldiń jáne kásibi qyzmettiń ashyq tarihynyń bolýy. Olardyń táýelsizdigi men ókilettikteri zańnamalyq deńgeide bekitiledi, bul atalǵan qyzmetterge sheshim qabyldaýǵa naqty áser etýge jáne buzýshylyqtardy erte satyda boldyrmaýǵa múmkindik beredi", delingen maqalada.
Sondai-aq direktorlar keńesiniń quramyna qoiylatyn talaptar da arttyryldy. Keńes músheleri, ásirese táýelsiz músheler, birqatar ólshemsharttarǵa sáikes kelýi kerek – bankpen úlestes bolmaýy, iskerlik bedel, biliktilik.
"Menedjmentke shamadan tys jaqyndaýǵa jol bermeý jáne táýelsiz kózqarasty saqtaý úshin ókilettik merzimine shekteýler engiziledi. Táýelsizdik ólshemsharttaryna sáikestikti jyl saiynǵy tekserý banktiń ózi tarapynan da, retteýshi tarapynan keiingi baǵalaý múmkindigimen de mindetti rásimge ainalady. Bul direktorlar keńesi sheshimderdi formaldy túrde maquldamai, shyn máninde qadaǵalaý fýnktsiiasyn oryndaýy úshin qajet", - deidi Sálimbaev.
Buǵan deiin "Aq jol" partiiasynyń depýtattary bankterdi el azamattary men biznestiń banktik shottary, qaldyq aqshalary men olardyń qozǵalysy týraly derekterdi salyq organyna berýdi mindetteitin erejeni engizýge qarsy shyqqanyn jazǵanbyz. Olar bul norma eldiń Konstitýtsiiasyna qaishy keledi jáne azamattardyń derekteriniń taralýyna qaýip tóndiredi dep sanaidy.
