Prezident Qasym-Jomart Toqaev elimizdiń barlyq óńirinde qurylys jumystaryn jandandyryp, áleýmettik infraqurylymdy damytý qajettigin aitty. Memleket basshysynyń sózinshe, halyqtyń turmys sapasyn jaqsartý úshin densaýlyq saqtaý, bilim berý, mádeniet jáne sport nysandaryna basymdyq berilýi tiis, dep habarlaidy dalanews.kz.
Prezident eldiń turaqty damýy alǵa qoiylǵan mindetterdiń qanshalyqty sapaly ári ýaqytyly oryndalatynyna bailanysty ekenin atap ótti. Osyǵan orai azamattardy qajetti áleýmettik infraqurylymmen qamtamasyz etý mańyzdy ekenin jetkizdi.
"Azamattarymyz tolyqqandy áleýmettik infraqurylymmen qamtylýy kerek. Bul – halyqtyń turmys sapasyn kóterýdiń mańyzdy sharty. Sondyqtan basty nazardy infraqurylym qurý isine aýdaramyz", – dedi Qasym-Jomart Toqaev.
Memleket basshysy qurylys jumystary jekelegen jobalarmen shektelmeýi kerektigin aityp, barlyq aimaqta aýqymdy jumystardy qolǵa alýdy tapsyrdy.
"Buǵan deiin de aittym: Qazaqstan aýqymdy qurylys alańyna ainalýǵa tiis. Másele jekelegen jobalarǵa qatysty bolyp otyrǵan joq. Jalpy, barlyq aimaqta jappai qurylysty bastap, jandandyrý qajet", – dedi Prezident.
Sonymen qatar Toqaev jańa nysandardy salmas buryn ár óńirdiń naqty qajettiligin anyqtaý mańyzdy ekenin atap ótti. Ol úshin oblystardaǵy áleýmettik infraqurylymnyń qazirgi jaǵdaiyna jan-jaqty taldaý júrgizilýi kerek.
Atap aitqanda, óńirlerge qansha aýrýhana, mektep, mádeniet jáne sport nysany qajet ekenin anyqtaý jumystaryn tez arada aiaqtaýdy tapsyrdy.
Prezidenttiń aitýynsha, mundai taldaý qurylys jumystaryn halyqtyń naqty suranysyna sai josparlaýǵa múmkindik beredi.
