Qazaqstan Aýǵanstanmen arada tike áýe reisin ashýy múmkin. Odan bólek Qazaqstan men Aýǵanstan Týrgýndi-Gerat temirjolyn salý týraly ýaǵdalastyqtarǵa qol jetkizdi, - dep habarlaidy Dalanews.kz.
Premer-ministrdiń orynbasary – ulttyq ekonomika ministri Serik Jumanǵarin bastaǵan qazaqstandyq delegatsiianyń Aýǵanstanǵa sapary sheńberinde Qazaqstannyń Saýda jáne integratsiia ministrligi men Aýǵanstannyń Qoǵamdyq jumystar ministrligi arasynda «Týrgýndi-Gerat-Qandaǵar-Spin-Boldak» temirjolynyń qurylysyna qatysýǵa niet bildirý týraly hattamaǵa qol qoiylǵan.
"Joba ózara aimaqtyq tranzittik bailanysty keńeitý, Ortalyq jáne Ońtústik Aziia arasyndaǵy kólik-logistikalyq bailanysty nyǵaitý, Úndi muhitynyń porttaryna qol jetkizýde Qazaqstan úshin erekshe mańyzǵa ie. Jańa temirjol jelisi Aýǵanstan aýmaǵy arqyly ótetindikten ári ońtústik baǵytta júk tasymaldaýda eń qysqa marshrýt bolǵandyqtan bolashaq transulttyq dálizdiń negizgi býyny sanalady", - dep jazylǵan habarlamada.
Qol qoiylǵan hattama AHQO iýrisdiktsiiasynda Qazaqstan, Aýǵanstan men Túrkimenstan temirjoldary arasynda birlesken kásiporyn qurýdy kózdeidi.
Temirjol jelisin salý kezinde talshyqtyq-optikalyq kabel tóseý kózdeledi. Bul bailanysty poiyz qozǵalysy qaýipsizdigin, olardy basqarýdy jaqsarta otyryp, kólik dálizi boiyndaǵy tsifrlyq infraqurylymdy damytady. Eldi mekenderdi bolashaqta joǵary jyldamdyqty internetke qosý múmkindigi artady.
Kabýl saparynyń sońǵy kúni Serik Jumanǵarin Aýǵanstannyń Azamattyq aviatsiia jáne kólik ministri Hamidýlla Ahunzadamen kezdesken.
Taraptar eki el arasynda tike áýe reisin ashý, qazaqstandyq avtokólikter men avtobýstardy Aýǵanstan naryǵyna jetkizý, sondai-aq, aýǵan stýdentterin qazaqstandyq joǵary oqý oryndarynda tehnikalyq mamandyqqa oqytýdyń keleshegin talqylaǵan.
