قازاقستان اۋعانستانمەن ارادا تىكە اۋە رەيسىن اشۋى مۇمكىن. ودان بولەك قازاقستان مەن اۋعانستان تۋرگۋندي-گەرات تەمىرجولىن سالۋ تۋرالى ۋاعدالاستىقتارعا قول جەتكىزدى، - دەپ حابارلايدى Dalanews.kz.
پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين باستاعان قازاقستاندىق دەلەگاسيانىڭ اۋعانستانعا ساپارى شەڭبەرىندە قازاقستاننىڭ ساۋدا جانە ينتەگراسيا مينيسترلىگى مەن اۋعانستاننىڭ قوعامدىق جۇمىستار مينيسترلىگى اراسىندا «تۋرگۋندي-گەرات-قانداعار-سپين-بولداك» تەمىرجولىنىڭ قۇرىلىسىنا قاتىسۋعا نيەت ءبىلدىرۋ تۋرالى حاتتاماعا قول قويىلعان.
"جوبا ءوزارا ايماقتىق ترانزيتتىك بايلانىستى كەڭەيتۋ، ورتالىق جانە وڭتۇستىك ازيا اراسىنداعى كولىك-لوگيستيكالىق بايلانىستى نىعايتۋ، ءۇندى مۇحيتىنىڭ پورتتارىنا قول جەتكىزۋدە قازاقستان ءۇشىن ەرەكشە ماڭىزعا يە. جاڭا تەمىرجول جەلىسى اۋعانستان اۋماعى ارقىلى وتەتىندىكتەن ءارى وڭتۇستىك باعىتتا جۇك تاسىمالداۋدا ەڭ قىسقا مارشرۋت بولعاندىقتان بولاشاق ترانسۇلتتىق ءدالىزدىڭ نەگىزگى بۋىنى سانالادى"، - دەپ جازىلعان حابارلامادا.
قول قويىلعان حاتتاما احقو يۋريسديكسياسىندا قازاقستان، اۋعانستان مەن تۇركىمەنستان تەمىرجولدارى اراسىندا بىرلەسكەن كاسىپورىن قۇرۋدى كوزدەيدى.
تەمىرجول جەلىسىن سالۋ كەزىندە تالشىقتىق-وپتيكالىق كابەل توسەۋ كوزدەلەدى. بۇل بايلانىستى پويىز قوزعالىسى قاۋىپسىزدىگىن، ولاردى باسقارۋدى جاقسارتا وتىرىپ، كولىك ءدالىزى بويىنداعى سيفرلىق ينفراقۇرىلىمدى دامىتادى. ەلدى مەكەندەردى بولاشاقتا جوعارى جىلدامدىقتى ينتەرنەتكە قوسۋ مۇمكىندىگى ارتادى.
كابۋل ساپارىنىڭ سوڭعى كۇنى سەرىك جۇمانعارين اۋعانستاننىڭ ازاماتتىق اۆياسيا جانە كولىك ءمينيسترى حاميدۋللا احۇنزادامەن كەزدەسكەن.
تاراپتار ەكى ەل اراسىندا تىكە اۋە رەيسىن اشۋ، قازاقستاندىق اۆتوكولىكتەر مەن اۆتوبۋستاردى اۋعانستان نارىعىنا جەتكىزۋ، سونداي-اق، اۋعان ستۋدەنتتەرىن قازاقستاندىق جوعارى وقۋ ورىندارىندا تەحنيكالىق ماماندىققا وقىتۋدىڭ كەلەشەگىن تالقىلاعان.
