Qazaqstan Respýblikasynyń Joǵary aýditorlyq palatasynyń málimetinshe, qazaqstandyq memlekettik aýditorlar Ázerbaijan Respýblikasynyń Esep palatasynyń 2025 qarjy jylyna arnalǵan qarjylyq eseptiligine aýdit júrgizip jatyr. Bul kelisim eki eldiń joǵary aýdit organdary basshylarynyń 2024–2025 jyldardaǵy ózara kezdesýleri men saparlarynyń nátijesinde jasalǵan, dep habarlaidy Dalanews.kz.
Vedomstvonyń habarlaýynsha, mundai ózara aýdit júrgizý tájiribesi halyqaralyq standarttarǵa sai keledi jáne álemdik praktikada keńinen qoldanylady. Tekseristiń basty maqsaty - Ázerbaijan Esep palatasynyń qarjylyq eseptiliginiń halyqaralyq býhgalterlik esep pen aýdit talaptaryna sáikestigin baǵalaý.
Aýdit barysynda mamandar normativtik-quqyqtyq bazany jáne qarjylyq qujattardy aldyn ala taldap, ishki baqylaý júiesine baǵa berdi. Sondai-aq qarjylyq eseptiń tolyqtyǵy men durystyǵy tekserilip, jaýapty laýazymdy tulǵalarmen suhbattar ótkizildi.
Aýdittiń kóshpeli kezeńi 2026 jylǵy 17–20 aqpan aralyǵynda Baký qalasynda ótti. Qazaqstan delegatsiiasyn Ázerbaijan Esep palatasynyń tóraǵasy Viýgar Giýlmamedov qarsy alyp, taraptar arasynda jumys kezdesýleri uiymdastyryldy.
Tekserý qorytyndysy boiynsha aýditorlyq esep daiyndalyp, onda qarjylyq eseptiń durystyǵyna baǵa berilip, qarjylyq basqarý men ishki baqylaýdy jetildirýge qatysty usynymdar usynylady. Sonymen birge Qazaqstan men Ázerbaijannyń joǵary aýdit organdary aldaǵy ýaqytta tájiribe almasýdy jalǵastyryp, birlesken jobalardy júzege asyrýǵa nietti.
