قازاقستان رەسپۋبليكاسىنىڭ جوعارى اۋديتورلىق پالاتاسىنىڭ مەلٸمەتٸنشە, قازاقستاندىق مەملەكەتتٸك اۋديتورلار ەزەربايجان رەسپۋبليكاسىنىڭ ەسەپ پالاتاسىنىڭ 2025 قارجى جىلىنا ارنالعان قارجىلىق ەسەپتٸلٸگٸنە اۋديت جٷرگٸزٸپ جاتىر. بۇل كەلٸسٸم ەكٸ ەلدٸڭ جوعارى اۋديت ورگاندارى باسشىلارىنىڭ 2024–2025 جىلدارداعى ٶزارا كەزدەسۋلەرٸ مەن ساپارلارىنىڭ نەتيجەسٸندە جاسالعان, دەپ حابارلايدى Dalanews.kz.
ۆەدومستۆونىڭ حابارلاۋىنشا, مۇنداي ٶزارا اۋديت جٷرگٸزۋ تەجٸريبەسٸ حالىقارالىق ستاندارتتارعا ساي كەلەدٸ جەنە ەلەمدٸك پراكتيكادا كەڭٸنەن قولدانىلادى. تەكسەرٸستٸڭ باستى ماقساتى - ەزەربايجان ەسەپ پالاتاسىنىڭ قارجىلىق ەسەپتٸلٸگٸنٸڭ حالىقارالىق بۋحگالتەرلٸك ەسەپ پەن اۋديت تالاپتارىنا سەيكەستٸگٸن باعالاۋ.
اۋديت بارىسىندا ماماندار نورماتيۆتٸك-قۇقىقتىق بازانى جەنە قارجىلىق قۇجاتتاردى الدىن الا تالداپ, ٸشكٸ باقىلاۋ جٷيەسٸنە باعا بەردٸ. سونداي-اق قارجىلىق ەسەپتٸڭ تولىقتىعى مەن دۇرىستىعى تەكسەرٸلٸپ, جاۋاپتى لاۋازىمدى تۇلعالارمەن سۇحباتتار ٶتكٸزٸلدٸ.
اۋديتتٸڭ كٶشپەلٸ كەزەڭٸ 2026 جىلعى 17–20 اقپان ارالىعىندا باكۋ قالاسىندا ٶتتٸ. قازاقستان دەلەگاتسيياسىن ەزەربايجان ەسەپ پالاتاسىنىڭ تٶراعاسى ۆيۋگار گيۋلمامەدوۆ قارسى الىپ, تاراپتار اراسىندا جۇمىس كەزدەسۋلەرٸ ۇيىمداستىرىلدى.
تەكسەرۋ قورىتىندىسى بويىنشا اۋديتورلىق ەسەپ دايىندالىپ, وندا قارجىلىق ەسەپتٸڭ دۇرىستىعىنا باعا بەرٸلٸپ, قارجىلىق باسقارۋ مەن ٸشكٸ باقىلاۋدى جەتٸلدٸرۋگە قاتىستى ۇسىنىمدار ۇسىنىلادى. سونىمەن بٸرگە قازاقستان مەن ەزەربايجاننىڭ جوعارى اۋديت ورگاندارى الداعى ۋاقىتتا تەجٸريبە الماسۋدى جالعاستىرىپ, بٸرلەسكەن جوبالاردى جٷزەگە اسىرۋعا نيەتتٸ.
