Joǵary bilikti mamandar úshin jahandyq báseke kúsheiip jatqan jaǵdaida Qazaqstan jańa kóshi-qon saiasatyn qalyptastyrýǵa kiristi, dep habarlaidy dalanews.kz.
Bul másele «Eńbek resýrstaryn damytý ortalyǵy» AQ alańynda ótken dóńgelek ústelde talqylandy. Is-sharaǵa memlekettik organdar, halyqaralyq uiymdar, sarapshylar jáne ǵylymi qaýymdastyq ókilderi qatysty.
Kezdesý barysynda joǵary bilikti mamandardy, investorlar men halyqaralyq deńgeidegi kadrlardy tartý, adami kapitaldy damytý jáne kóshi-qon úderisterin tsifrlandyrý máseleleri kóterildi. Sondai-aq sheteldik mamandar men kásipkerler úshin Qazaqstanda uzaq merzimdi jumys isteýge jáne turýǵa qolaily jaǵdai jasaý tetikteri qarastyryldy.
QR Eńbek jáne halyqty áleýmettik qorǵaý birinshi vitse-ministri Erbol Tuiaqbaev jańa saiasat kóshi-qon protsesterin tiimdi basqarýǵa jáne adami kapitaldy tartýǵa baǵyttalǵanyn aitty.
«Qujatta “QazETA” biryńǵai tsifrlyq platformasyn “e-Residency” modýlimen engizý, “e-Residency Invest” baǵdarlamasyn iske qosý, sondai-aq joǵary bilikti mamandar, investorlar men kásipkerler úshin birqatar artyqshylyqtardy kózdeitin arnaiy “Altyn vizany” engizý qarastyrylǵan», – dedi Erbol Tuiaqbaev.
Onyń aitýynsha, «Altyn viza» strategiialyq investorlar men ekonomikaǵa qajet bilikti mamandardyń quqyqtyq mártebesin uzaq merzimge bekitýge múmkindik beredi. Jańa tetik 2026 jyldyń sońyna deiin engiziledi dep josparlanyp otyr.
QR Prezidenti janyndaǵy Qazaqstandyq strategiialyq zertteýler institýtynyń ókili Anna Alshanskaia álem elderi qazir adami kapital úshin básekeni kúsheitip jatqanyn atap ótti.
«Qazaqstan bilikti mamandardy tartýdyń óńirlik ortalyǵy retinde proaktivti pozitsiia ustana otyryp, ishki mobildilikti teńgerimdi aýmaqtyq damýdyń mańyzdy resýrsy retinde paidalana alady», – dedi ol.
Bastamalardy Halyqaralyq kóshi-qon uiymy da qoldady. Uiym ókilderi ikemdi ári ashyq kóshi-qon júiesi Qazaqstannyń halyqaralyq básekege beiimdelýindegi mańyzdy qadam bolatynyn aitty.
«Memleket basshysynyń sheshimin iske asyrý halyqaralyq bilikti mamandar men investitsiialardy tartýǵa ǵana emes, sonymen qatar qazaqstandyq jastardy bolashaq eńbek naryǵyna beiimdeýge de jańa múmkindikter ashady», – dedi HKQU missiiasy basshysynyń mindetin atqarýshy Áliia Belonosova.
Sarapshylardyń pikirinshe, jańa kóshi-qon saiasaty, tsifrlandyrý jáne «altyn viza» tetigi Qazaqstannyń óńirlik deńgeide bilikti mamandar habyna ainalýyna múmkindik berýi múmkin.
