Qazaqstan ártúrli halyqaralyq reitingter men indeksterde túrli kórsetkishter boiynsha baǵalanyp keledi. Keibir salalarda elimiz kósh basynda tursa, keibir baǵyttarda kórsetkishter áli de jaqsartýdy qajet etedi, dep habarlaidy Dalanews.kz.
Finneews.kz túrli saladaǵy tizimge sholý jasady.
Azyq-túlik infliatsiiasy
2026 jylǵa jasalǵan boljam boiynsha Qazaqstan azyq-túlik infliatsiiasy joǵary elderdiń qataryna endi. Kórsetkish 12,7 paiyzdy qurap, álem boiynsha 9-orynǵa turaqtaǵan. Bul tizimde Iran (55,9%), Argentina (33,2%) jáne Túrkiia (25,1%) sekildi elder alǵashqy qatarda tur.
Ýran óndirý
Qazaqstan ýran óndirý boiynsha álemdegi jetekshi memleketterdiń biri ǵana emes, №1 orynda tur. Sarapshylardyń málimetinshe, elimiz álemdik ýran óndirisiniń shamamen 40 paiyzyn qamtamasyz etedi. Bul kórsetkish Qazaqstannyń energetikalyq shikizat naryǵyndaǵy mańyzdy rólin aiqyn kórsetedi.
Baqyt indeksi
Halyqaralyq baqyt indeksinde Qazaqstan 147 eldiń ishinde 43-oryndy ielengen. Eldiń jalpy kórsetkishi 6,378 ball dep baǵalanǵan. Bul Qazaqstannyń álemdik reitingtiń joǵarǵy úshten bir bóliginde ornalasqanyn ańǵartady.
Áskeri qýat reitingi
Global Firepower uiymynyń derekterine sáikes, áskeri áleýet tehnika, adam resýrsy, qarjy, logistika jáne geografiialyq múmkindikter siiaqty 60-tan astam faktor boiynsha baǵalanady. Osy reitingte Qazaqstan 145 eldiń ishinde 58-orynda tur.
Sybailas jemqorlyqty qabyldaý indeksi
Transparency International uiymy jariialaǵan málimetke sáikes, Qazaqstan 182 eldiń ishinde 96-orynǵa jaiǵasqan. Eldiń kórsetkishi 38 ball dep baǵalanǵan. Bul indeks qoǵamnyń memlekettik júiege degen senimi men jemqorlyqty qabyldaý deńgeiin kórsetedi.
Baspasóz erkindigi
Baspasóz erkindigi indeksinde Qazaqstan 180 eldiń ishinde 141-oryndy ielengen. Sarapshylar bul reitingti jýrnalisterdiń jumys jaǵdaiy, media erkindigi jáne aqparat taratýdaǵy shekteýler siiaqty faktorlar arqyly baǵalaidy.
Jalpy alǵanda, Qazaqstan tabiǵi resýrstardy igerý sekildi keibir strategiialyq salalarda álemdik kóshbasshylar qatarynda tur. Degenmen áleýmettik-ekonomikalyq jáne institýtsionaldyq kórsetkishter boiynsha áli de atqarylar jumys bar ekeni baiqalady.
