«Qazaqsha úirenýge sóz beremin». «Jiyn-sharlarda qazaqsha sóileitin bolamyn». Aqyshev, Súleimenov odan beridegi Ábilqasymova siiaqtylardyń bergen ýádesi bul. Kúlkili.
Qazaqsha sóileýge, qazaqsha úirenýge ýəde bergeniniń ózi kúlkili.
Jaraidy, Másimov bolsa bir jón. Toqaev bolsa da túsineiik. "Miymdy aýystyryńdar, áitpese qazaq tilin úirene almaimyn" degen Ydyrysovty da túsinýge tyrysaiyq. Saǵadievti de osy sanatqa qosaiyq.
Táýelsizdik tusynda er jetken ilgeridegi Aqyshev, Súleimenov pen Ábilqasymovanyń til bilmeýin keshirýge bola ma, biraq?
Qudai biledi, úirenbeidi. Osy ketkeni ketken. Alda-jalda memlekettik tildiń mərtebesi shyn kóterilip jaǵdai ózgermese ómir boiy osylai ótedi.
«Qazaqsha sóileitin bolamyn» degeni bizdińshe, mindetsiný. «Sizder suraǵannan keiin, men úirenip kóreiin» degen túri.
Bulardyń qazaqsha sóilegeninen, qazaqsha úirengeninen kelip-keteri joq bizge. Ózi úshin úirenbeidi óitkeni.
«Bul meniń tilim, ony bilmeýim uiat, sóilemeýim, tipti, soraqy» degen túsinik bolsa, aitqyzbai-aq əldeqashan úirener edi, igerer edi.
Týǵan tilimen qaita qaýyshqandardyń túsiniginde tóńkeris bolady, negizinde. Ómirge qaita kelgende kúi keshedi. Ondai kórgen joqpyz, ókinishtisi...
Sheneýnikter úshin ýədelerdiń ishindegi eń jeńili — qazaqsha úirený. Oryndalmaityn ýáde – bul.
Saǵyntaev úkimetindegi birneshe ministrden bastap óńirdegi əkimderdiń birqatary memlekettik tildi meńgerem dep ýəde bergen. Oryndady ma ýádesin? Umytyp ketti.
«Sen nege til bilmeisiń?» dep eshkim keńirdekten almaidy, eshkim jumystan qýmaidy óitkeni. Qazaq tilin bilmeitinder úshin bizdiń elde barynsha keńshilik jasalǵan.
Dosaevtyń nemese Aqyshevtyń qazaqsha sóilegenin estip pe edik, aitalyq? Estigenbiz, biraq bul qazaqsha emes. Sonyń syqpyty ǵana.
«Salemetsizder me!», «Rýksat etinizder!», «Kýttyktaimyn!» nemese «bárine túsinikti bolý úshin...» deý asa qiyn da emes.
«Qazaqpen qazaqtyń qazaqsha sóilesýi» aldymen bilikten bastalýy kerek edi.
Nazarbaevtyń sózi joǵaryda júrgenderge qatysy joq pa álde?
Saǵyntaev úkimeti Nazarbaevtyń keshegi sózin naqty qaperge aldy dep seneiik.
Dýman BYQAI
