«Qazaqmys korporasıasy» JSHS Basqarma tóraǵasy Rýslan Óskenáli Jambyl oblysyndaǵy Shatyrkól-Jaısań klasteriniń kásiporyndaryna jumys saparymen bardy. Sapar aıasynda kompanıa basshysy «Jaısań» jáne «Shatyrkól» kenishteriniń jumysymen tanysyp, Shatyrkól baıytý fabrıkasyn aralady. Sonymen qatar vahtalyq kenttegi jumysshylardyń turmys jaǵdaıymen tanysyp, tamaqtandyrýdyń uıymdastyrylýyn tekserdi, dep habarlaıdy Dalanews.kz.
Búginde Shatyrkól-Jaısań klasterine «Shatyrkól» kenishi jáne Shatyrkól baıytý fabrıkasy kiredi. Ol óńir ekonomıkasyna eleýli úles qosyp otyrǵan kompanıanyń asa mańyzdy óndiristik nysandarynyń biri.
Sapar barysynda Shatyrkól baıytý fabrıkasyn odan ári paıdalaný máselesine erekshe nazar aýdaryldy. Merdiger uıymmen jasalǵan kelisimsharttyq mindettemelerdiń aıaqtalýyna baılanysty kásiporyndy odan ári basqarý tikeleı «Qazaqmys» korporasıasy arqyly júzege asyrylady
Kompanıa fabrıkanyń jabdyqtaryn paıdalaný jáne óndiristik qyzmetin qamtamasyz etýge tartylǵan qyzmetkerlerdi jumysqa qabyldaýǵa daıyn ekenin rastady.
Jumysqa qabyldaý kezinde qyzmetkerlerdiń jaǵdaıy burynǵydan tómendemeıdi. Jalaqy, ótemaqy jáne yntalandyrý tólemderi, vahtalyq jumys tártibi, turmystyq jaǵdaı jáne tamaqtaný sharty, sondaı-aq Qazaqstan Respýblıkasynyń eńbek zańnamasynda jáne eńbek shartynda kózdelgen barlyq kepildikter saqtalady
«Búginde Shatyrkól fabrıkasynda eńbek etip júrgen kásibı ujymdy saqtaý biz úshin asa mańyzdy. Bul mamandar kásiporynnyń turaqty jumys isteýine qajetti tájirıbe men bilimge ıe. Biz jumyskerlerdiń jalaqy deńgeıin, áleýmettik kepildikterdi, vahtalyq kenttegi turmys jaǵdaıyn jáne jumys tártibin saqtaı otyryp, shtatqa qabyldaýǵa daıynbyz. Bizdiń mindetimiz – óndiristiń úzdiksiz jumysyn qamtamasyz etý, kadrlyq áleýetti saqtaý jáne Shatyrkól-Jaısań klasteriniń turaqty damýyn jalǵastyrý», – dep atap ótti «Qazaqmys korporasıasy» JSHS Basqarma tóraǵasy Rýslan Óskenáli.
Qyzmetkerlerdi jumysqa qabyldaý Qazaqstan Respýblıkasy eńbek zańnamasynyń talabyna sáıkes jeke tártippen júzege asyrylady.
Bul sheshim óndiristik úderistiń úzdiksizdigin qamtamasyz etýge, kadrlyq áleýetti saqtaýǵa jáne kásiporyndaǵy áleýmettik turaqtylyqty qoldaýǵa baǵyttalǵan. Sonymen qatar ol Shatyrkól-Jaısań klasteriniń óndiristik yqpaldastyǵyn kúsheıtýge, ónerkásiptik qaýipsizdiktiń biryńǵaı standartyn qamtamasyz etýge jáne tehnologıalyq úderisti basqarý tıimdiligin arttyrýǵa múmkindik beredi.
