«قازاقمىس كورپوراسياسى» ج ش س باسقارما ءتوراعاسى رۋسلان وسكەنالى جامبىل وبلىسىنداعى شاتىركول-جايساڭ كلاستەرىنىڭ كاسىپورىندارىنا جۇمىس ساپارىمەن باردى. ساپار اياسىندا كومپانيا باسشىسى «جايساڭ» جانە «شاتىركول» كەنىشتەرىنىڭ جۇمىسىمەن تانىسىپ، شاتىركول بايىتۋ فابريكاسىن ارالادى. سونىمەن قاتار ۆاحتالىق كەنتتەگى جۇمىسشىلاردىڭ تۇرمىس جاعدايىمەن تانىسىپ، تاماقتاندىرۋدىڭ ۇيىمداستىرىلۋىن تەكسەردى، دەپ حابارلايدى Dalanews.kz.
بۇگىندە شاتىركول-جايساڭ كلاستەرىنە «شاتىركول» كەنىشى جانە شاتىركول بايىتۋ فابريكاسى كىرەدى. ول ءوڭىر ەكونوميكاسىنا ەلەۋلى ۇلەس قوسىپ وتىرعان كومپانيانىڭ اسا ماڭىزدى وندىرىستىك نىساندارىنىڭ ءبىرى.
ساپار بارىسىندا شاتىركول بايىتۋ فابريكاسىن ودان ءارى پايدالانۋ ماسەلەسىنە ەرەكشە نازار اۋدارىلدى. مەردىگەر ۇيىممەن جاسالعان كەلىسىمشارتتىق مىندەتتەمەلەردىڭ اياقتالۋىنا بايلانىستى كاسىپورىندى ودان ءارى باسقارۋ تىكەلەي «قازاقمىس» كورپوراسياسى ارقىلى جۇزەگە اسىرىلادى
كومپانيا فابريكانىڭ جابدىقتارىن پايدالانۋ جانە وندىرىستىك قىزمەتىن قامتاماسىز ەتۋگە تارتىلعان قىزمەتكەرلەردى جۇمىسقا قابىلداۋعا دايىن ەكەنىن راستادى.
جۇمىسقا قابىلداۋ كەزىندە قىزمەتكەرلەردىڭ جاعدايى بۇرىنعىدان تومەندەمەيدى. جالاقى، وتەماقى جانە ىنتالاندىرۋ تولەمدەرى، ۆاحتالىق جۇمىس ءتارتىبى، تۇرمىستىق جاعداي جانە تاماقتانۋ شارتى، سونداي-اق قازاقستان رەسپۋبليكاسىنىڭ ەڭبەك زاڭناماسىندا جانە ەڭبەك شارتىندا كوزدەلگەن بارلىق كەپىلدىكتەر ساقتالادى
«بۇگىندە شاتىركول فابريكاسىندا ەڭبەك ەتىپ جۇرگەن كاسىبي ۇجىمدى ساقتاۋ ءبىز ءۇشىن اسا ماڭىزدى. بۇل ماماندار كاسىپورىننىڭ تۇراقتى جۇمىس ىستەۋىنە قاجەتتى تاجىريبە مەن بىلىمگە يە. ءبىز جۇمىسكەرلەردىڭ جالاقى دەڭگەيىن، الەۋمەتتىك كەپىلدىكتەردى، ۆاحتالىق كەنتتەگى تۇرمىس جاعدايىن جانە جۇمىس ءتارتىبىن ساقتاي وتىرىپ، شتاتقا قابىلداۋعا دايىنبىز. ءبىزدىڭ مىندەتىمىز – ءوندىرىستىڭ ۇزدىكسىز جۇمىسىن قامتاماسىز ەتۋ، كادرلىق الەۋەتتى ساقتاۋ جانە شاتىركول-جايساڭ كلاستەرىنىڭ تۇراقتى دامۋىن جالعاستىرۋ»، – دەپ اتاپ ءوتتى «قازاقمىس كورپوراسياسى» ج ش س باسقارما ءتوراعاسى رۋسلان وسكەنالى.
قىزمەتكەرلەردى جۇمىسقا قابىلداۋ قازاقستان رەسپۋبليكاسى ەڭبەك زاڭناماسىنىڭ تالابىنا سايكەس جەكە تارتىپپەن جۇزەگە اسىرىلادى.
بۇل شەشىم وندىرىستىك ۇدەرىستىڭ ۇزدىكسىزدىگىن قامتاماسىز ەتۋگە، كادرلىق الەۋەتتى ساقتاۋعا جانە كاسىپورىنداعى الەۋمەتتىك تۇراقتىلىقتى قولداۋعا باعىتتالعان. سونىمەن قاتار ول شاتىركول-جايساڭ كلاستەرىنىڭ وندىرىستىك ىقپالداستىعىن كۇشەيتۋگە، ونەركاسىپتىك قاۋىپسىزدىكتىڭ ءبىرىڭعاي ستاندارتىن قامتاماسىز ەتۋگە جانە تەحنولوگيالىق ۇدەرىستى باسقارۋ تيىمدىلىگىن ارتتىرۋعا مۇمكىندىك بەرەدى.
