Jambyl oblysynyń Shý qalasy men Birlik aýylynda zamanaýı, jyldam salynatyn modýldik sport zaldary paıdalanýǵa berildi. Joba Qazaqmys korporasıasy JSHS qoldaýymen, «Qazaqstan halqyna» qoǵamdyq qory jáne oblys ákimdigi arasyndaǵy áriptestik aıasynda júzege asyryldy, dep habarlaıdy Dalanews.kz

Qurylysqa baǵyttalǵan ınvestısıanyń jalpy kólemi 346 mln teńgeni qurady. Jańa nysandar jyl boıy paıdalanýǵa arnalǵan jáne kún saıyn 100-ge jýyq adamǵa sporpen aınalysýǵa múmkindik beredi.

Sport zaldary fýtbol, voleıbol jáne basketbol sıaqty komandalyq sport túrlerimen aınalysýǵa laıyqtalyp jasalǵan. Olardyń ashylýy 40 myńnan astam turǵyny bar Shý qalasynda sporttyq ınfraqurylymnyń tapshylyǵyn tómendetýge múmkindik beredi. Sonymen qatar Birlik aýylynyń turǵyndaryna (shamamen 5 myń adam) qys mezgilinde de sportpen aınalysý úshin jaǵdaı jasaıdy. Munda balalar men jasóspirimder, onyń ishinde erekshe qajettiligi bar balalar úshin nysandardyń qoljetimdiligine erekshe kóńil bólingen.

Nysandardyń ashylý rásimine Jambyl oblysynyń ákimi Erbol Qarashókeev, jergilikti atqarýshy organdardyń jáne «Qazaqstan halqyna» qoǵamdyq qorynyń ókilderi, óńir jurtshylyǵy men sport ardagerleri qatysty.

Jobany iske asyrý «Qazaqmystyń» ózine qatysy bar óńirlerdi damytý jónindegi júıeli jumysynyń bir bóligi sanalady. Jambyl oblysynda bul jumys Shý aýdany ákimdigimen jasasqan ózara is-qımyl jónindegi memorandým aıasynda júrgizilip, áleýmettik jáne ınjenerlik ınfraqurylymdy damytýdy, eldi mekenderdi abattandyrý men halyqty qoldaýdy qamtıdy.

2023 jyldan beri óńirdegi áleýmettik jobalardy qarjylandyrýdyń jalpy kólemi 1,7 mlrd teńgeni qurady. Qazirgi tańda sport jáne balalar alańdaryn salý, eldi mekenderdi abattandyrý, sondaı-aq áleýmettik osal sanattaǵy azamattardy qoldaý baǵytyndaǵy jobalar iske asyryldy. Sport jáne bilim berý ınfraqurylymyn damytý boıynsha jumys jalǵasýda.