جامبىل وبلىسىنىڭ شۋ قالاسى مەن بىرلىك اۋىلىندا زاماناۋي، جىلدام سالىناتىن مودۋلدىك سپورت زالدارى پايدالانۋعا بەرىلدى. جوبا قازاقمىس كورپوراسياسى ج ش س قولداۋىمەن، «قازاقستان حالقىنا» قوعامدىق قورى جانە وبلىس اكىمدىگى اراسىنداعى ارىپتەستىك اياسىندا جۇزەگە اسىرىلدى، دەپ حابارلايدى Dalanews.kz

قۇرىلىسقا باعىتتالعان ينۆەستيسيانىڭ جالپى كولەمى 346 ملن تەڭگەنى قۇرادى. جاڭا نىساندار جىل بويى پايدالانۋعا ارنالعان جانە كۇن سايىن 100-گە جۋىق ادامعا سپورپەن اينالىسۋعا مۇمكىندىك بەرەدى.

سپورت زالدارى فۋتبول، ۆولەيبول جانە باسكەتبول سياقتى كوماندالىق سپورت تۇرلەرىمەن اينالىسۋعا لايىقتالىپ جاسالعان. ولاردىڭ اشىلۋى 40 مىڭنان استام تۇرعىنى بار شۋ قالاسىندا سپورتتىق ينفراقۇرىلىمنىڭ تاپشىلىعىن تومەندەتۋگە مۇمكىندىك بەرەدى. سونىمەن قاتار بىرلىك اۋىلىنىڭ تۇرعىندارىنا (شامامەن 5 مىڭ ادام) قىس مەزگىلىندە دە سپورتپەن اينالىسۋ ءۇشىن جاعداي جاسايدى. مۇندا بالالار مەن جاسوسپىرىمدەر، ونىڭ ىشىندە ەرەكشە قاجەتتىلىگى بار بالالار ءۇشىن نىسانداردىڭ قولجەتىمدىلىگىنە ەرەكشە كوڭىل بولىنگەن.

نىسانداردىڭ اشىلۋ راسىمىنە جامبىل وبلىسىنىڭ اكىمى ەربول قاراشوكەيەۆ، جەرگىلىكتى اتقارۋشى ورگانداردىڭ جانە «قازاقستان حالقىنا» قوعامدىق قورىنىڭ وكىلدەرى، ءوڭىر جۇرتشىلىعى مەن سپورت ارداگەرلەرى قاتىستى.

جوبانى ىسكە اسىرۋ «قازاقمىستىڭ» وزىنە قاتىسى بار وڭىرلەردى دامىتۋ جونىندەگى جۇيەلى جۇمىسىنىڭ ءبىر بولىگى سانالادى. جامبىل وبلىسىندا بۇل جۇمىس شۋ اۋدانى اكىمدىگىمەن جاساسقان ءوزارا ءىس-قيمىل جونىندەگى مەموراندۋم اياسىندا جۇرگىزىلىپ، الەۋمەتتىك جانە ينجەنەرلىك ينفراقۇرىلىمدى دامىتۋدى، ەلدى مەكەندەردى اباتتاندىرۋ مەن حالىقتى قولداۋدى قامتيدى.

2023 جىلدان بەرى وڭىردەگى الەۋمەتتىك جوبالاردى قارجىلاندىرۋدىڭ جالپى كولەمى 1،7 ملرد تەڭگەنى قۇرادى. قازىرگى تاڭدا سپورت جانە بالالار الاڭدارىن سالۋ، ەلدى مەكەندەردى اباتتاندىرۋ، سونداي-اق الەۋمەتتىك وسال ساناتتاعى ازاماتتاردى قولداۋ باعىتىنداعى جوبالار ىسكە اسىرىلدى. سپورت جانە ءبىلىم بەرۋ ينفراقۇرىلىمىن دامىتۋ بويىنشا جۇمىس جالعاسۋدا.