Mashkenov bir kún buryn pyshaqqa túsken Miniǵulovty tanymaitynyn basa atap ótti. Biraq óz-ózine qol jumsaǵan Tájbenovpen birge ol jumys barysymen jaqsy tanys eken.
– Ol sabyrly adam bolatyn, degenmen ádiletsizdikke kelgende eshnársege tózbeitin, birden kóterilip shyǵatyn, menińshe, bizdegi ár ekinshi adam «osyndai» shyǵar, – dedi Mashkenov.
Shyn máninde, salalyq kásipodaq quramyna kiretin ujymdarda ishki janjal, narazylyqqa keletin bolsaq, ol bólek áńgime.
– Ondai bizde únemi bolyp turady. Uiym úlken, respýblikalyq mártebege ie, shamamen 60 myń adam jumys isteidi. Ár ujymda jalaqyǵa, eńbek jaǵdailary boiynsha túrli shaǵym men talaptar bolady ǵoi. Ol osy máselelerdiń bárimen betpe-bet kelip júrgen adam. Shamasy, osyndai kezde qandai da bir shielenis ýshyqqan bolýy múmkin. Tájbenov ujymdyq organdardyń kelisiminsiz óz betinshe kóbine sheshim qabyldai bastady sońǵy kezderi. Eger ujymdyq organdar deńgeiinde osy máseleler qaralsa, jumys berýshimen ústel basynda máseleni sheshýge bolar edi, onda bul janjal bolmas pa edi. (...) Qandai da bir qaqtyǵys boldy ǵoi, bir-birin jaqtyrmai qaldy ma nemese basqa nárse boldy ma eken. Ústel basyna otyryp, kelissóz júrgizýdiń ornyna, mine osyndai yńǵaisyz jaǵdai oryn aldy, sońy tóbeleske, qol jumsaýǵa ulasqan, – dedi ol.
Salalyq kásipodaq qyzmetkerleri oqiǵanyń mán-jaiyn anyqtaý úshin Jezqazǵanǵa attanyp ketti. Aita ketsek, marqum Toǵyzbai Tájbenovtiń denesin 24 qańtarda jer qoinyna tapsyrady.
21 qańtarda «Kásipqorǵan» kásipodaǵynyń tóraǵasy Toǵyzbai Tájbenov qyzmettik keńsede ózara sózge kelgen «Qazaqmys korporatsiiasy» JShS bas direktory Amangeldi Miniǵulovty tóbeles kezinde pyshaqpen jaraqattady.
Sondai-aq, ekeýine ara túspek bolǵan korporatsiianyń qyzmetkeri Sabyrjan Tembaev ta keýde tusynan pyshaq jaraqatyn aldy. Osy jaittardan soń kásipodaq qyzmetkeri óz-ózine qol jumsady.
Dárigerler «Qazaqmys» korporatsiiasynyń taý-ken baiytý kesheniniń bas direktory Amangeldi Miniǵulov pen onyń qol astyndaǵy basqarmalardyń biriniń jetekshisi Sabyrjan Tembaevqa ota jasalǵanyn habarlaǵan. Bas direktordyń jaǵdaiy aýyr, ol áli esin jimaǵan, jan saqtaý bóliminde jatyr. Al qasyndaǵy Tembaev hirýrgiia bólimine jatqyzylǵan.
