ماشكەنوۆ ءبىر كۇن بۇرىن پىشاققا تۇسكەن ءمىنىعۇلوۆتى تانىمايتىنىن باسا اتاپ ءوتتى. ءبىراق وز-وزىنە قول جۇمساعان تاجبەنوۆپەن بىرگە ول جۇمىس بارىسىمەن جاقسى تانىس ەكەن.
– ول سابىرلى ادام بولاتىن، دەگەنمەن ادىلەتسىزدىككە كەلگەندە ەشنارسەگە توزبەيتىن، بىردەن كوتەرىلىپ شىعاتىن، مەنىڭشە، بىزدەگى ءار ەكىنشى ادام «وسىنداي» شىعار، – دەدى ماشكەنوۆ.
شىن مانىندە، سالالىق كاسىپوداق قۇرامىنا كىرەتىن ۇجىمداردا ىشكى جانجال، نارازىلىققا كەلەتىن بولساق، ول بولەك اڭگىمە.
– ونداي بىزدە ۇنەمى بولىپ تۇرادى. ۇيىم ۇلكەن، رەسپۋبليكالىق مارتەبەگە يە، شامامەن 60 مىڭ ادام جۇمىس ىستەيدى. ءار ۇجىمدا جالاقىعا، ەڭبەك جاعدايلارى بويىنشا ءتۇرلى شاعىم مەن تالاپتار بولادى عوي. ول وسى ماسەلەلەردىڭ بارىمەن بەتپە-بەت كەلىپ جۇرگەن ادام. شاماسى، وسىنداي كەزدە قانداي دا ءبىر شيەلەنىس ۋشىققان بولۋى مۇمكىن. تاجبەنوۆ ۇجىمدىق ورگانداردىڭ كەلىسىمىنسىز ءوز بەتىنشە كوبىنە شەشىم قابىلداي باستادى سوڭعى كەزدەرى. ەگەر ۇجىمدىق ورگاندار دەڭگەيىندە وسى ماسەلەلەر قارالسا، جۇمىس بەرۋشىمەن ۇستەل باسىندا ماسەلەنى شەشۋگە بولار ەدى، وندا بۇل جانجال بولماس پا ەدى. (...) قانداي دا ءبىر قاقتىعىس بولدى عوي، ءبىر-بىرىن جاقتىرماي قالدى ما نەمەسە باسقا نارسە بولدى ما ەكەن. ۇستەل باسىنا وتىرىپ، كەلىسسوز جۇرگىزۋدىڭ ورنىنا، مىنە وسىنداي ىڭعايسىز جاعداي ورىن الدى، سوڭى توبەلەسكە، قول جۇمساۋعا ۇلاسقان، – دەدى ول.
سالالىق كاسىپوداق قىزمەتكەرلەرى وقيعانىڭ ءمان-جايىن انىقتاۋ ءۇشىن جەزقازعانعا اتتانىپ كەتتى. ايتا كەتسەك، مارقۇم توعىزباي تاجبەنوۆتىڭ دەنەسىن 24 قاڭتاردا جەر قوينىنا تاپسىرادى.
21 قاڭتاردا «كاسىپقورعان» كاسىپوداعىنىڭ ءتوراعاسى توعىزباي تاجبەنوۆ قىزمەتتىك كەڭسەدە ءوزارا سوزگە كەلگەن «قازاقمىس كورپوراسياسى» ج ش س باس ديرەكتورى امانگەلدى ءمىنىعۇلوۆتى توبەلەس كەزىندە پىشاقپەن جاراقاتتادى.
سونداي-اق، ەكەۋىنە ارا تۇسپەك بولعان كورپوراسيانىڭ قىزمەتكەرى سابىرجان تەمبايەۆ تا كەۋدە تۇسىنان پىشاق جاراقاتىن الدى. وسى جايتتاردان سوڭ كاسىپوداق قىزمەتكەرى وز-وزىنە قول جۇمسادى.
دارىگەرلەر «قازاقمىس» كورپوراسياسىنىڭ تاۋ-كەن بايىتۋ كەشەنىنىڭ باس ديرەكتورى امانگەلدى ءمىنىعۇلوۆ پەن ونىڭ قول استىنداعى باسقارمالاردىڭ ءبىرىنىڭ جەتەكشىسى سابىرجان تەمبايەۆقا وتا جاسالعانىن حابارلاعان. باس ديرەكتوردىڭ جاعدايى اۋىر، ول ءالى ەسىن جيماعان، جان ساقتاۋ بولىمىندە جاتىر. ال قاسىنداعى تەمبايەۆ حيرۋرگيا بولىمىنە جاتقىزىلعان.
