Memleket basshysy Qasym-Jomart Toqaev Mádeniet jáne aqparat ministri Aida Balaevany qabyldap, vedomstvonyń biylǵy jumystary men aldaǵy josparlaryn tyńdady, dep habarlaidy Dalanews.kz.
Ministr mádeniet, aqparat, azamattyq qoǵam, din, etnosaralyq qatynas, jastar saiasaty, kreativti indýstriia, otbasy-demografiialyq saiasat, muraǵat jáne kitaphana isi salalaryndaǵy atqarylǵan jumystar týraly baiandady. Sonymen qatar, 2025 jylǵa deiingi perspektivalyq josparlardy júzege asyrýǵa daiyndyq jóninde málimet berdi.
Mádeniet salasyndaǵy jetistikter:
• Biyl qazaq óneri Venetsiia biennalesinde jáne Gime Aziia óneri mýzeiinde álemge tanystyryldy;
• Qazaqstannyń baspa ónimderi Frankfýrt kitap jármeńkesinde kórsetildi;
• Qazaq Culture aqparattyq-aǵartýshylyq platformasy segiz tilde iske qosyldy;
• Astanada ótken V Dúniejúzilik kóshpendiler oiyndarynyń saltanatty rásimderi joǵary deńgeide ótti.
Zańnamalyq jumystar:
• Jýrnalisterdiń mártebesin arttyrýǵa baǵyttalǵan jańa BAQ týraly zań qabyldandy;
• «Qazaqfilm» kinostýdiiasyn qarjylandyrýdy tikelei qarastyratyn zań jobasy Parlamentke usynyldy.
Eriktiler qozǵalysy:
• Belsendi eriktiler sany 240 myń adamǵa jetti;
• 50-den astam volonterlik joba júzege asyryldy, 7 qazaqstandyq erikti BUU-nyń jobalaryna tartyldy.
Kreativti indýstriia:
• Kreativti indýstriia qoryn qurý jáne arnaiy salyq rejimin engizý jumystary júrgizildi;
• Elimizde 10 jańa kreativti ortalyq pen hab ashyldy.
Prezident aldaǵy jyly Qazaqstan halqy Assambleiasynyń 30 jyldyǵy, Uly Jeńistiń 80 jyldyǵy jáne Álemdik jáne dástúrli dinder kóshbasshylary sezi siiaqty mańyzdy is-sharalardy joǵary deńgeide uiymdastyrýdy tapsyrdy.
