"Qazaq tili oidy "dostýpno" jetkize almai ma?". Saýytbek Ábdirahmanov qazaq tiliniń múddesin qorǵady
Otyrys barysynda respýblikalyq advokattar alqasynyń tóraǵasy Ánýar Túgel depýtattardyń qazaq tilinde qoiǵan suraqtaryna orys tilinde jaýap berip otyrdy.
Suraqtar aiaqtalǵannan keiin depýtat Saýytbek Ábdirahmanov sóz alyp, advokattan qazaq tilin kemsitpeýdi surady.
− Depýtattyń suraǵyna jaýap bere otyryp, siz "hochý otvetit na rýsskom iazyke, tak býdet dostýpnee" degenińizdi qalai túsinýge bolady? Depýtat Magerramovtyń suraǵyna jaýap qaitarǵan kezde de sol logika boiynsha sóiledińiz. Sonda sizdiń pikirińizshe, jaýapty qazaq tilinde qaitarǵanda oidy "dostýpno" jetkizýdiń múmkindigi joq pa? Meniń oiymsha, sizdiń jaýaptaryńyzdyń tili basqa úshin emes, siz úshin túsinikti. Bul basqa másele. Biraq qazaq tilin kemsitip sóilemeýdi suraimyz, − dedi halyq qalaýlysy.
Óz kezeginde otyrysqa tóraǵalyq etip otyrǵan Májilis tóraǵasynyń orynbasary Vladimir Bojko depýtattyń eskertýine qoldaý bildirdi.
− Bul durys dep oilaimyn. Qazaq tilin oqyńyzdar. Qazaq tiliniń qoldanys aiasy keńeiip keledi. Bárimizge, onyń ishinde maǵan da tildi jetildirý kerek, − dedi ol.
