Qazaq tazylary Helsinkidegi WDS 2025 Dúniejúzilik itter kórmesinde resmi túrde alǵash ret álemge tanystyryldy
8 tamyzda Finliandiia astanasy Helsinkide ótip jatqan halyqaralyq kinologiialyq federatsiia (FCI) egidasy aiasyndaǵy World Dog Show 2025 dúniejúzilik itter kórmesinde «Qazaq tazysy» it tuqymy resmi túrde álemge tanystyryldy.
Dúniejúzilik is-sharaǵa Qazaqstan delegatsiiasy qatań talap boiynsha iriktelgen ári halyqaralyq deńgeide óner kórsetýge barynsha úiretilgen 8 tazyny aparǵan bolatyn. Álemniń ár túkpirinen kelgen 25 000 úzdik ittiń ishinde qazaq tazylary FCI uiymynda tirkelgen derbes it tuqymy retinde tuńǵysh ret jurt nazaryna usynylyp otyr.
Qazaqtyń tól it tuqymdary alǵashqy saiysta aitarlyqtai mańyzdy nátijege qol jetkizdi: 5 tazy ózderiniń ringterinde júldeli oryndardy jeńip aldy. «2025 jylǵy Álemniń jas chempiony» atalymynda Temirlan atty tazy jeńimpaz boldy, Lashyn - «Álem chempiony», Arý atty taǵy bir tazy - «Álem chempiony», Kókserek pen Pana - «Álemniń vitse-chempiondary» atandy.
Buǵan qosa, Lashyn men Arý Finliandiia chempiondary retinde marapattaldy.
Qazaqstannyń tanystyrylymy kórme qatysýshylary men qonaqtarynyń qyzyǵýshylyǵyn týdyrdy. Ulttyq atribýttary bar jartylai orda túrindegi pavilon is-sharadaǵy kózge kóbirek túsken alańdardyń birine ainaldy. Qonaqtar Qazaqstannan kelgen ittermen sýretke túsip, onyń syrtqy sipatyndaǵy erekshelikterimen, tarihymen, erekshe qasietterimen tanysty.
Qazaqstan kinologtary odaǵynyń tazynyń shyǵý tegi, qasietteri týraly baiandady, halqymyz ony nelikten jaqsy kóretinin jáne qadirleitinin túsindirdi, ol bizdiń ulttyq bailyǵymyz, halqymyzdyń jeti qazynasynyń biri sanalatynyn jetkizdi.
Qazaqy tazyny saqtaý jáne tanytý jónindegi jumystar Memleket basshysynyń tapsyrmasy boiynsha, 2022 jyldyń tamyz aiynan beri QR Prezidenti Is basqarmasynyń jetekshiligimen júrgizilip keledi. Úsh jylda Qazaqstan kinologtary odaǵymen birlesip, osy baǵytta aýqymdy jumys atqaryldy:
2023 jyly tamyz aiynda Qazaqstan kinologtary odaǵy FCI-dyń tolyqquqyly músheligine ótip, ulttyq it tuqymdaryn halyqaralyq arenada tanystyrý quqyna ie boldy.
2024 jyly mamyrda Astanada ótken monotuqymdy itter kórmesi kezinde FCI komissiiasy 100 tazyny zerttedi.
2024 jyly 3 qyrkúiekte Amsterdamda «qazaqy tazy» tuqymyn ádepki taný týraly sheshim shyǵyp, Qazaqstanǵa onyń tolyqqandy iesi degen mártebe berildi.
Tazy tuqymyn damytý, halyqaralyq saiystarǵa belsendi túrde qatystyrý syndy sharttar oryndalǵan jaǵdaida 2034 jylǵa qarai ony tolyqtai taný týraly sheshim shyǵýǵa tiis. World Dog Show 2025 kórmesine qatysyp, Helsinkide tazylardy resmi túrde jurt nazaryna usyný osy baǵyttaǵy mańyzdy qadamdardyń biri boldy.
