قازاق تازىلارى حەلسينكيدەگى WDS 2025 دۇنيەجۇزىلىك يتتەر كورمەسىندە رەسمي تۇردە العاش رەت الەمگە تانىستىرىلدى
8 تامىزدا فينليانديا استاناسى حەلسينكيدە ءوتىپ جاتقان حالىقارالىق كينولوگيالىق فەدەراسيا (FCI) ەگيداسى اياسىنداعى World Dog Show 2025 دۇنيەجۇزىلىك يتتەر كورمەسىندە «قازاق تازىسى» يت تۇقىمى رەسمي تۇردە الەمگە تانىستىرىلدى.
دۇنيەجۇزىلىك ءىس-شاراعا قازاقستان دەلەگاسياسى قاتاڭ تالاپ بويىنشا ىرىكتەلگەن ءارى حالىقارالىق دەڭگەيدە ونەر كورسەتۋگە بارىنشا ۇيرەتىلگەن 8 تازىنى اپارعان بولاتىن. الەمنىڭ ءار تۇكپىرىنەن كەلگەن 25 000 ۇزدىك ءيتتىڭ ىشىندە قازاق تازىلارى FCI ۇيىمىندا تىركەلگەن دەربەس يت تۇقىمى رەتىندە تۇڭعىش رەت جۇرت نازارىنا ۇسىنىلىپ وتىر.
قازاقتىڭ ءتول يت تۇقىمدارى العاشقى سايىستا ايتارلىقتاي ماڭىزدى ناتيجەگە قول جەتكىزدى: 5 تازى وزدەرىنىڭ رينگتەرىندە جۇلدەلى ورىنداردى جەڭىپ الدى. «2025 جىلعى الەمنىڭ جاس چەمپيونى» اتالىمىندا تەمىرلان اتتى تازى جەڭىمپاز بولدى، لاشىن - «الەم چەمپيونى»، ارۋ اتتى تاعى ءبىر تازى - «الەم چەمپيونى»، كوكسەرەك پەن پانا - «الەمنىڭ ۆيسە-چەمپيوندارى» اتاندى.
بۇعان قوسا، لاشىن مەن ارۋ فينليانديا چەمپيوندارى رەتىندە ماراپاتتالدى.
قازاقستاننىڭ تانىستىرىلىمى كورمە قاتىسۋشىلارى مەن قوناقتارىنىڭ قىزىعۋشىلىعىن تۋدىردى. ۇلتتىق اتريبۋتتارى بار جارتىلاي وردا تۇرىندەگى پاۆيلون ءىس-شاراداعى كوزگە كوبىرەك تۇسكەن الاڭداردىڭ بىرىنە اينالدى. قوناقتار قازاقستاننان كەلگەن يتتەرمەن سۋرەتكە ءتۇسىپ، ونىڭ سىرتقى سيپاتىنداعى ەرەكشەلىكتەرىمەن، تاريحىمەن، ەرەكشە قاسيەتتەرىمەن تانىستى.
قازاقستان كينولوگتارى وداعىنىڭ تازىنىڭ شىعۋ تەگى، قاسيەتتەرى تۋرالى باياندادى، حالقىمىز ونى نەلىكتەن جاقسى كورەتىنىن جانە قادىرلەيتىنىن ءتۇسىندىردى، ول ءبىزدىڭ ۇلتتىق بايلىعىمىز، حالقىمىزدىڭ جەتى قازىناسىنىڭ ءبىرى سانالاتىنىن جەتكىزدى.
قازاقى تازىنى ساقتاۋ جانە تانىتۋ جونىندەگى جۇمىستار مەملەكەت باسشىسىنىڭ تاپسىرماسى بويىنشا، 2022 جىلدىڭ تامىز ايىنان بەرى ق ر پرەزيدەنتى ءىس باسقارماسىنىڭ جەتەكشىلىگىمەن جۇرگىزىلىپ كەلەدى. ءۇش جىلدا قازاقستان كينولوگتارى وداعىمەن بىرلەسىپ، وسى باعىتتا اۋقىمدى جۇمىس اتقارىلدى:
2023 جىلى تامىز ايىندا قازاقستان كينولوگتارى وداعى FCI-دىڭ تولىققۇقىلى مۇشەلىگىنە ءوتىپ، ۇلتتىق يت تۇقىمدارىن حالىقارالىق ارەنادا تانىستىرۋ قۇقىنا يە بولدى.
2024 جىلى مامىردا استانادا وتكەن مونوتۇقىمدى يتتەر كورمەسى كەزىندە FCI كوميسسياسى 100 تازىنى زەرتتەدى.
2024 جىلى 3 قىركۇيەكتە امستەردامدا «قازاقى تازى» تۇقىمىن ادەپكى تانۋ تۋرالى شەشىم شىعىپ، قازاقستانعا ونىڭ تولىققاندى يەسى دەگەن مارتەبە بەرىلدى.
تازى تۇقىمىن دامىتۋ، حالىقارالىق سايىستارعا بەلسەندى تۇردە قاتىستىرۋ سىندى شارتتار ورىندالعان جاعدايدا 2034 جىلعا قاراي ونى تولىقتاي تانۋ تۋرالى شەشىم شىعۋعا ءتيىس. World Dog Show 2025 كورمەسىنە قاتىسىپ، حەلسينكيدە تازىلاردى رەسمي تۇردە جۇرت نازارىنا ۇسىنۋ وسى باعىتتاعى ماڭىزدى قادامداردىڭ ءبىرى بولدى.
