Dástúrli sadaq atýdan ulttyq qurama sportshylary osy kúzde Astanada ótetin 5-shi Dúnıejúzilik kóshpendiler oıyndaryna degen daıyndyqtaryn qyzdyra tústi. Sadaqshylar dúbirli dodada saıys ótetin alańda, ıaǵnı «Qazanat» ıpodromynda sheberlikterin shyńdap jatyr, – dep habarlaıdy Dalanews.kz Ulttyq sport qaýymdastyǵynyń baspasóz qyzmetine silteme jasap.
Dástúrli sadaq atýdan ulttyq qurama bas bapkeri Dıas Ahmetovtiń aıtýynsha, búginde DKO aıasynda ótetin dástúrli sadaq atý saıysyna qatysýǵa 35 memleketten ótinish túsken.
– Qazir akkredasıa jumystary júrgizilip jatyr. Baıraqty básekede Túrkıa, Malaızıa, Qyrǵyzstan, Vengrıa, Reseı syndy memleketterdiń sadaqshylary jaqsy óner kórsetetini belgili. Degenmen, bizdiń sportshylarymyz ózderiniń myqtylyǵyn dáleldeıtinine senimdimin, – deıdi ol.
Kóshpendiler oıyndaryna degen daıyndyqtary jaıly dástúrli sadaq atýdan ulttyq qurama músheleri de aıtyp berdi.
– Bul báseke bizdiń alańda ótetin bolǵandyqtan moınymyzda zor jaýapkershilik bar ekenin bilemiz. Al saıys ótetin alańda jattyǵý biz úshin jaqsy múmkindik. Óıtkeni bul jerdi tolyq zerttep, klımatyn, jel jyldamdyǵyn, nysananyń ornalasýy syndy mańyzdy tusttardy túrtip alyp jatyrmyz, – dep atap ótti sadaq atýdan ulttyq qurama múshesi Baqbergen Sálimov.
– 5-shi Dúnıejúzilik kóshpendiler oıyndarynyń bastalýyna óte az ýaqyt qaldy. Árıne, biz daıyndyǵymyzdy qyzdyra tústik. Meniń oıymsha, baıraqty báseke elimizde ótetindikten, mindetti túrde kópshilikti altynmen qýantamyz, – deıdi sadaq atýdan ulttyq qurama múshesi Ajar Rahmetqyzy.
Eske sala keteıik, Respýblıkalyq «Dástúrli sadaq atý» federasıasy Qazaqstan Respýblıkasy Ulttyq sport qaýymdastyǵynyń quramyna kiredi. Qaýymdastyq quramynda budan ózge «Báıge», «Kókpar», «Teńge ilý», «Aýdaryspaq», «Jamby atý», «Qusbegilik», «Asyq atý», «JORYQ» at sporty jáne t.b. federasıalar bar. QR Ulttyq sport qaýymdastyǵyn Islambek Saljanov basqarady.
Aıta keterligi, 8-13 qyrkúıekte Astana qalasynda 5-shi Dúnıejúzilik kóshpendiler oıyndary ótedi. İs-sharaǵa 89 elden 2000-nan astam sportshy qatysady dep josparlanýda. 5-shi Dúnıejúzilik kóshpendiler oıyndarynyń Bas demeýshisi – ALAGEUM ELECTRIC, Oıyndardyń Bas seriktesi - Halyk Bank. Astanada ótetin Dúnıejúzilik kóshpendiler oıyndarynda barlyǵy 21 sport túrinen 97 medal jıyntyǵy sarapqa salynady.
