ءداستۇرلى ساداق اتۋدان ۇلتتىق قۇراما سپورتشىلارى وسى كۇزدە استانادا وتەتىن 5ء-شى دۇنيەجۇزىلىك كوشپەندىلەر ويىندارىنا دەگەن دايىندىقتارىن قىزدىرا ءتۇستى. ساداقشىلار ءدۇبىرلى دودادا سايىس وتەتىن الاڭدا، ياعني «قازانات» يپپودرومىندا شەبەرلىكتەرىن شىڭداپ جاتىر، – دەپ حابارلايدى Dalanews.kz ۇلتتىق سپورت قاۋىمداستىعىنىڭ باسپا ءسوز قىزمەتىنە سىلتەمە جاساپ.
ءداستۇرلى ساداق اتۋدان ۇلتتىق قۇراما باس باپكەرى دياس احمەتوۆتىڭ ايتۋىنشا، بۇگىندە دكو اياسىندا وتەتىن ءداستۇرلى ساداق اتۋ سايىسىنا قاتىسۋعا 35 مەملەكەتتەن ءوتىنىش تۇسكەن.
– ءقازىر اككرەداسيا جۇمىستارى جۇرگىزىلىپ جاتىر. بايراقتى باسەكەدە تۇركيا، مالايزيا، قىرعىزستان، ۆەنگريا، رەسەي سىندى مەملەكەتتەردىڭ ساداقشىلارى جاقسى ونەر كورسەتەتىنى بەلگىلى. دەگەنمەن، ءبىزدىڭ سپورتشىلارىمىز وزدەرىنىڭ مىقتىلىعىن دالەلدەيتىنىنە سەنىمدىمىن، – دەيدى ول.
كوشپەندىلەر ويىندارىنا دەگەن دايىندىقتارى جايلى ءداستۇرلى ساداق اتۋدان ۇلتتىق قۇراما مۇشەلەرى دە ايتىپ بەردى.
– بۇل باسەكە ءبىزدىڭ الاڭدا وتەتىن بولعاندىقتان موينىمىزدا زور جاۋاپكەرشىلىك بار ەكەنىن بىلەمىز. ال سايىس وتەتىن الاڭدا جاتتىعۋ ءبىز ءۇشىن جاقسى مۇمكىندىك. ويتكەنى بۇل جەردى تولىق زەرتتەپ، كليماتىن، جەل جىلدامدىعىن، نىسانانىڭ ورنالاسۋى سىندى ماڭىزدى تۇستتاردى ءتۇرتىپ الىپ جاتىرمىز، – دەپ اتاپ ءوتتى ساداق اتۋدان ۇلتتىق قۇراما مۇشەسى باقبەرگەن ءسالىموۆ.
– 5ء-شى دۇنيەجۇزىلىك كوشپەندىلەر ويىندارىنىڭ باستالۋىنا وتە از ۋاقىت قالدى. ارينە، ءبىز دايىندىعىمىزدى قىزدىرا تۇستىك. مەنىڭ ويىمشا، بايراقتى باسەكە ەلىمىزدە وتەتىندىكتەن، مىندەتتى تۇردە كوپشىلىكتى التىنمەن قۋانتامىز، – دەيدى ساداق اتۋدان ۇلتتىق قۇراما مۇشەسى اجار راحمەت قىزى.
ەسكە سالا كەتەيىك، رەسپۋبليكالىق «ءداستۇرلى ساداق اتۋ» فەدەراسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە «بايگە»، «كوكپار»، «تەڭگە ءىلۋ»، «اۋدارىسپاق»، «جامبى اتۋ»، «قۇسبەگىلىك»، «اسىق اتۋ»، «JORYQ» ات سپورتى جانە ت.ب. فەدەراسيالار بار. ق ر ۇلتتىق سپورت قاۋىمداستىعىن يسلامبەك سالجانوۆ باسقارادى.
ايتا كەتەرلىگى، 8-13 قىركۇيەكتە استانا قالاسىندا 5ء-شى دۇنيەجۇزىلىك كوشپەندىلەر ويىندارى وتەدى. ءىس-شاراعا 89 ەلدەن 2000-نان استام سپورتشى قاتىسادى دەپ جوسپارلانۋدا. 5ء-شى دۇنيەجۇزىلىك كوشپەندىلەر ويىندارىنىڭ باس دەمەۋشىسى – ALAGEUM ELECTRIC، ويىنداردىڭ باس سەرىكتەسى - Halyk Bank. استانادا وتەتىن دۇنيەجۇزىلىك كوشپەندىلەر ويىندارىندا بارلىعى 21 سپورت تۇرىنەن 97 مەدال جيىنتىعى ساراپقا سالىنادى.
