Elimizdiń kınematografıa salasyn damytýǵa úlesin qosyp júrgen jáne onyń álemdik deńgeıde tanymal bolýyna qosqan úlesi úshin kınorejısser Sergeı Dvorsevoıǵa óńir basshysy jerlesteriniń atynan shynaıy alǵysyn jetkizip, «Oblysqa sińirgen eńbegi úshin» medalimen marapattady. Sonymen qosa Qazaqstan men Reseı arasyndaǵy mádenı baılanystardy nyǵaıtý jolyndaǵy eńbegine sáttilik tiledi.
– Siz túsirgen «Aıka» fılmi 71-shi Kann kınofestıvalinde álemdik deńgeıdegi eń úzdik 20 kartınanyń quramynda qazylar alqasynyń, kıno synshylar men eýropanyń talǵampaz kórermeniniń joǵary baǵasyna ıe boldy. Sizdiń kásibı sheberligińizdiń jáne rejıserlik deńgeıińizdiń joǵary bolýynyń arqasynda qazaqstandyq Samal Eslámova úzdik áıel róli úshin joǵary marapatqa ıe boldy. Mundaı jaǵdaı, Postkeńestik elder arasynan shyqqan ártistiń osyndaı marapatqa ıe bolýy Kann festıvali tarıhynda buryn sońdy bolmaǵanyn eskersek bul úlken oqıǵa! – dedi J.Túımebaev.
Óz kezinde kınorejısser Sergeı Dvorsevoı kórsetilip jatqan qurmet pen qoshemet úshin alǵysyn bildirip, aldaǵy ýaqytta Qazaqstannyń kınematografıa salasynyń damýy jolynda aıanbaı eńbek etetinin senimmen jetkizdi. Sonymen qatar Ońtústik óńirinde kınoındýstrıany damytýǵa erekshe kóńil bólinip, jan-jaqty qoldaý kórsetilip jatqanynan habary bar ekenin aıtyp ótti.
Osy rette aımaq basshysy oblysta búginde onǵa jýyq kınostýdıanyń bar ekenin aıtyp, solardyń biri halyqaralyq festıváldardyń jeńimpazy, jas urpaqty tárbıeleýge arnalǵan qazaq tilindegi 50-ge jýyq anımasıalyq fılm túsirgen «Saq» kınostýdıasyn atap ótkim keledi dedi.
– Elbasynyń «Bolashaqqa baǵdar: rýhanı jańǵyrý» maqalasy aıasynda tarıhı-mádenı muralardy nasıhattap, jastarǵa patrıottyq tárbıe berý maqsatynda 2017 jyly «Ońtústikfılm» men «Saq» kınostýdıasy birlesip «Kóne jetigenniń syry» atty 10 serıaly telehıkaıa, «Kıeli Qazyǵurt», «Otyrardy qorǵaý», «Kúsh atasy – Qajymuqan» atty anımasıalyq jáne «Uly Jibek Jolyndaǵy eskertkishter» derekti fılm túsirildi.Al osy jyldyń sońyna deıin «Tóle bı» kópserıaldy fılmi men «Ordabasy – birliktiń týy», «Kóne Túrkistan», «Oqsyz oqıǵasy» atty anımasıalyq fılmder túsirledi, – dedi oblys ákimi.
Aıta keteıik, Sergeı Dvorsevoı 1962 jyly Shymkent qalasynda dúnıege kelgen. N.Mıhalkovtyń «Nıka» syılyǵynyń laýreaty. Álemdik deńgeıdegi mamandardy moıyndatqan kınony túsirgen ol buǵan deıin, «Trassa», «V temnote» derekti fılmder men qysqa metrajdy «Schaste», «Hlebnyı den» kıno týyndylaryn túsirip kóptegen halyqaralyq festıváldar men baıqaýlardyń qatysýshysy atanǵan. Al 2008 jyly «Túlpan» fılmi Kann kınofestıvalinde «Erekshe kózqaras» atalymy boıynsha marapattalǵan.
OQO ákiminiń baspasóz qyzmeti
