Qyrǵyzstan prezidenti Sadyr Japarov áleýmettik jelide Kenesary han týraly videoǵa qatysty pikir bildirip, qos halyqqa úndeý jasady, dep habarlaidy Dalanews.kz.
"Internette qyrǵyz ben qazaq halqynyń arasyna jik salǵan video paida boldy. Qazaq pen qyrǵyz ejelden bir týǵan, bir maqsattaǵy halyqtar", – dedi Sadyr Japarov.
Japarovtyń sózinshe, eki baýyrlas halyqtyń arasyna ot tastap jatqan arandatýshylar kezdesip otyr. Maqsaty – tarihty burmalap, eki eldi jaýlastyrý.
"Arandatý úshin ońai taqyryptardyń biri retinde on toǵyzynshy ǵasyrdaǵy tarihymyzdyń tragediialyq betteri, ásirese, Kenesary hannyń qyrǵyz jerine basyp kirýi jáne onyń ólimimen aiaqtalǵan oqiǵalar tańdalyp otyr. Men bul taqyrypty qozǵap, shaiqaltqysy keletinderdiń áreketterin kópten beri baqylap kelemin", – dedi ol.
Qyrǵyzstan prezidenti bul oqiǵany óz betinshe oqyp, zerdelegenin, jaqsy biletinin málimdegen. Sadyr Japarov belgili oqiǵalar men tulǵalar jaiynda aqparat bergen.
"Bul oqiǵalar tarihqa ainaldy. Odan sabaq alýymyz kerek", – dedi Japarov.
Onyń aitýynsha, araǵa ot salǵysy keletinder eki elde de bar.
"Birazdan beri baiqap júrmin. Eki halyqty bir-birine qarsy qoiýdy kózdegen bir kúsh paida boldy. Ondailar eki eldiń de ishinde bar", – dedi qyrǵyz prezidenti.
Úndeý sońynda Sadyr Japarov Qyrǵyzstan men Qazaqstan jastarynyń arandatýshylyqqa boi aldyrmaitynyna, biraq tarihty zerttep, halyqtar arasyndaǵy dostyqty nyǵaitatynyna senim bildirgen.
Oǵan qosa óziniń qazaqqa jien bolyp keletinin de aitqan.
