قىرعىزستان پرەزيدەنتى سادىر جاپاروۆ الەۋمەتتىك جەلىدە كەنەسارى حان تۋرالى ۆيدەوعا قاتىستى پىكىر ءبىلدىرىپ، قوس حالىققا ۇندەۋ جاسادى، دەپ حابارلايدى Dalanews.kz.
"ينتەرنەتتە قىرعىز بەن قازاق حالقىنىڭ اراسىنا جىك سالعان ۆيدەو پايدا بولدى. قازاق پەن قىرعىز ەجەلدەن ءبىر تۋعان، ءبىر ماقساتتاعى حالىقتار"، – دەدى سادىر جاپاروۆ.
جاپاروۆتىڭ سوزىنشە، ەكى باۋىرلاس حالىقتىڭ اراسىنا وت تاستاپ جاتقان ارانداتۋشىلار كەزدەسىپ وتىر. ماقساتى – تاريحتى بۇرمالاپ، ەكى ەلدى جاۋلاستىرۋ.
"ارانداتۋ ءۇشىن وڭاي تاقىرىپتاردىڭ ءبىرى رەتىندە ون توعىزىنشى عاسىرداعى تاريحىمىزدىڭ تراگەديالىق بەتتەرى، اسىرەسە، كەنەسارى حاننىڭ قىرعىز جەرىنە باسىپ كىرۋى جانە ونىڭ ولىمىمەن اياقتالعان وقيعالار تاڭدالىپ وتىر. مەن بۇل تاقىرىپتى قوزعاپ، شايقالتقىسى كەلەتىندەردىڭ ارەكەتتەرىن كوپتەن بەرى باقىلاپ كەلەمىن"، – دەدى ول.
قىرعىزستان پرەزيدەنتى بۇل وقيعانى ءوز بەتىنشە وقىپ، زەردەلەگەنىن، جاقسى بىلەتىنىن مالىمدەگەن. سادىر جاپاروۆ بەلگىلى وقيعالار مەن تۇلعالار جايىندا اقپارات بەرگەن.
"بۇل وقيعالار تاريحقا اينالدى. ودان ساباق الۋىمىز كەرەك"، – دەدى جاپاروۆ.
ونىڭ ايتۋىنشا، اراعا وت سالعىسى كەلەتىندەر ەكى ەلدە دە بار.
"ءبىرازدان بەرى بايقاپ ءجۇرمىن. ەكى حالىقتى بىر-بىرىنە قارسى قويۋدى كوزدەگەن ءبىر كۇش پايدا بولدى. وندايلار ەكى ەلدىڭ دە ىشىندە بار"، – دەدى قىرعىز پرەزيدەنتى.
ۇندەۋ سوڭىندا سادىر جاپاروۆ قىرعىزستان مەن قازاقستان جاستارىنىڭ ارانداتۋشىلىققا بوي الدىرمايتىنىنا، ءبىراق تاريحتى زەرتتەپ، حالىقتار اراسىنداعى دوستىقتى نىعايتاتىنىنا سەنىم بىلدىرگەن.
وعان قوسا ءوزىنىڭ قازاققا جيەن بولىپ كەلەتىنىن دە ايتقان.
