Qazaq ǵalymdary eń úzdik teleskoptarmen jumys isteidi
Seminar barysynda «Ulttyq ǵaryshtyq zertteýler men tehnologiialar ortalyǵy» AQ men Japoniianyń Ulttyq Astronomiialyq Observatoriiasy arasynda Yntymaqtastyq jáne ózara túsinistik memorandýmyna qol qoiyldy.
«Bul kelisim bizdiń ǵalymdarǵa álemdegi eń úzdik teleskoptarmen jumys isteýge múmkindik beredi. Japoniia men Gavai araldarynda «Sýbarý» dep atalatyn teleskoptar ornalasqan. Olar álemdegi eń úlken teleskoptar qataryna jatady. Odan basqa, Memorandým otandyq jas ǵalymdardyń biliktigin arttyrýǵa septigin tigizedi», – dedi óz sózinde V. G. Fesenkov atyndaǵy astrofizika institýtynyń direktory, fizika-matematika ǵylymdarynyń kandidaty Shyńǵys Omarov. Japondyq ǵalym, professor Kazýhiro Sekigýchi mundai kelisimge Japoniia Ulttyq Observatoriiasy da múddeli ekendigin jetkizdi. Óitkeni, ǵaryshty teleskoptar arqyly zertteýde Qazaqstannyń geografiialyq jaǵdaiy óte qolaily.
