Qazan aiynda Elektrondyq eńbek birjasynda belsendilik tómendep, maýsymdyq mamandyqtarǵa suranys artqan. Bul týraly QR Eńbek jáne halyqty áleýmettik qorǵaý ministrligi habarlaidy, dep jazady Dalanews.kz.
Usynylǵan derekke sáikes, qazan aiynda Elektrondyq eńbek birjasynda (EEB) 123,7 myń bos jumys orny jáne 106 myń túiindeme ornalastyryldy.
"Aldyńǵy aimen salystyrǵanda izdeý jáne jaldaý belsendiligi tómendedi: bos jumys oryndarynyń sany 9%-ǵa (13 myń), al túiindeme 13%-ǵa (16,5 myń) azaidy. Belsendiliktiń tómendeýi bilim berý salasyndaǵy suranys pen usynystyń tómendeýimen túsindiriledi, oqý oryndarynda kadrlardy daiarlaýdyń aiaqtalýyna bailanysty bolýy múmkin", delingen QR Eńbek jáne halyqty áleýmettik qorǵaý ministrligi habarlamasynda.
Eńbekminniń málimetinshe, qazan aiynda eń joǵary jalaqy myna mamandyq ielerine usynylǵan:
- bas qurylysshylarǵa - orta eseppen 679 myń teńge,
- bas tehnikalyq mamandarǵa - shamamen 565 myń teńge,
- ushý qaýipsizdigi jónindegi injenerlerge (shamamen 554 myń teńge).
Qazan aiynda myna mamandyq laýazymyna úmitker izdenýshiler joǵary jalaqy suraǵan:
- investitsiialyq jobalar jónindegi direktor - orta eseppen 2 mln teńgeden bastap,
- óndiristi basqarýdyń avtomattandyrylǵan júiesi bóliminiń bastyǵy - shamamen 1,8 mln teńge,
- kombainer - 1,2 mln teńge.
Alaida, qyrkúiek aiyndaǵy siiaqty, jylytý maýsymyna kóshý kezeńi jylý jáne qazandyq jabdyqtaryna qyzmet kórsetý men olardy paidalanýǵa qatysty qyzmetkerlerge suranystyń artýyna sebep boldy.
"Máselen, ótken aida qazandyq operatorlary (+5,9 myń), qazandyq mashinisteri (+1,1 myń) jáne qazandyqtar jumyskeri (+969) úshin bos oryndar sany artty. Mundai mamandarǵa joǵary suranys Batys Qazaqstan (2,9 myń bos jumys orny), Aqtóbe (1,3 myń) jáne Jambyl (974) oblystarynda baiqaldy", delingen habarlamada.
Suranystyń aitarlyqtai ósýi mal ósirýshiler men janýarlardy kútý jumyskerleri siiaqty mamandyqtarǵa da tirkeldi, bul ásirese, mal sharýashylyǵyndaǵy qysqy kezeńge daiyndyq kezeńinde mańyzdy.
Óńirler bólinisinde jumys berýshiler bilikti kadrlardy myna óńirlerden izdestirdi:
- Qaraǵandy oblysynan (9,5 myń bos jumys orny nemese jalpy sanynyń 8%),
- Almaty qalasynan (9,3 myń nemese 7,5%),
- Batys Qazaqstan oblysynan (9,2 myń nemese 7,5%)
- Astana qalasynan (8,1 myń nemese 7%)
Bul rette qazan aiynda bos jumys oryndarynyń jalpy sany kelesi óńirlerde azaidy: Almaty (-44%, nemese -3,9 myń), Jetisý (-37%, nemese -1,6 myń) jáne Astana qalasynda (-34%, nemese -4,1 myń).
Suranys pen usynystyń teńgerimsizdigi keibir aýmaqtarda ózekti másele bolyp qala beredi. Máselen, Shyǵys Qazaqstan oblysynda 5,5 myń bos orynǵa 2,5 myń túiindeme, Soltústik Qazaqstan oblysynda 4,1 myń bos orynǵa 2 myń túiindeme, al Pavlodar oblysynda 6,5 myń bos orynǵa 3,4 myń túiindeme tirkeldi.
Shymkent qalasynda, Qyzylorda jáne Túrkistan oblystarynda bos oryndar sanynan tiisinshe 54%, 48% jáne 47%-ǵa túiindemeniń artyq bolýy baiqalýda.
Eńbekmin jalpy, qazan aiynda EEB belsendilik tómendedi, bul ásirese, bilim berý salasynda baiqalyp otyrǵanan basa aitady. Sonymen qatar qysqy maýsymnyń bastalýy jylý óndirisi júiesiniń jumysshylaryna suranystyń artýyna sebep boldy.
