2026 jyly ótetin XXV qysqy Olimpiada oiyndarynda Ýkraina ulttyq quramasynyń tý ustaýshysy, ýkrainalyq skeletonist Vladislav Geraskevich Reseidiń Ýkrainaǵa qarsy soǵysynda qaza tapqan ýkrain sportshylarynyń portretteri beinelengen dýlyǵany kimeý týraly talapty oryndaýdan bas tartqany úshin jarystarǵa qatysý quqyǵynan aiyryldy, dep habarlaidy Dalanews.kz.
«Biz eshqandai erejeni buzǵan joqpyz jáne bul dýlyǵamen óner kórsetýge tolyq quqyǵymyz boldy dep áli kúnge deiin esepteimin. Osy Olimpiada oiyndarynyń aldyńǵy kúnderinde ózge sportshylar da uqsas áreketke barǵan», – dep túsindirdi Geraskevich Sýspilne Sport telearnasyna bergen pikirinde.
Ol ne sebepti sanktsiialar dýlyǵalarda reseilik týdy paidalanǵan jaǵdaida qoldanylmaǵanyn, «nelikten shańǵyshy áriptesine arnalǵan estelik jazýmen jarysqa shyǵýǵa quqyly da, al olarǵa bolmaidy» degen suraqtardyń jaýabyn almaǵanyn aitty. Geraskevich diskvalifikatsiiaǵa bailanysty Sporttyq arbitraj sotyna shaǵym túsiretinin málimdedi.
Ýkrainalyq skeletonistiń Olimpiadadan shettetilgeni týraly Halyqaralyq Olimpiada komiteti qabyldaǵan sheshim Ýkrainada úlken narazylyq tolqynyn týdyrdy. Vladislav Geraskevichti qoldap birden Ýkraina ulttyq olimpiadalyq komiteti málimdeme jasady.
«Ol qaza tapqan ýkrain sportshylary men barlyq Batyrlarymyzǵa qurmet belgisi retinde “estelik dýlyǵamen” startqa shyǵýy tiis edi. Búgin Vladislav jarysqa shyqpady, biraq ol jalǵyz emes – onyń janynda búkil Ýkraina boldy. Óitkeni sportshy shyndyq, ar-namys pen jady úshin kúresse – bul jeńis. Vladislav úshin jeńis. Búkil el úshin jeńis», – delingen 12 aqpan, beisenbi kúni UOK-tyń Facebook paraqshasynda jariialanǵan habarlamada.
Zelenskiidiń reaktsiiasy
Qysqy Olimpiadaǵa qatysýshy ýkrain sportshysyna qatysty shyqqan daý Ýkraina prezidentiniń de nazarynan tys qalmady.
«Sport olimpiadalyq qozǵalys, ol bir búiregin agressorǵa burmai, soǵysty toqtatýǵa kómektesýi kerek. Ókinishke qarai, UOK-tyń ýkrainalyq skeletonist Vladislav Geraskevichti diskvalifikatsiialaý týraly sheshimi kerisinshe jaǵdaidy kórsetip otyr. Bul – ádilet pen beibitshilikti qoldaýǵa negizdelgen olimpiadalyq qaǵidattar týraly emes», – dep jazdy Vladimir Zelenskii áleýmettik jelidegi paraqshasynda.
